ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

ԱՌՈՂՋԱՊԱՀՈՒԹՅԱՆ ՆԱԽԱՐԱՐ

16 հունվարի 2020 թ.

N 01-Ն

Հ Ր Ա Մ Ա Ն

 ՄԱՏԱԿԱՐԱՐԻ ՊԱՏՇԱՃ ԲԱՇԽՄԱՆ ԳՈՐԾՈՒՆԵՈՒԹՅԱՆ ՀԱՄԱՐ ՊԱՏԱՍԽԱՆԱՏՈՒ ԱՆՁԻՆ ՆԵՐԿԱՅԱՑՎՈՂ ՊԱՀԱՆՋՆԵՐԸ ՍԱՀՄԱՆԵԼՈՒ ՄԱՍԻՆ

Հիմք ընդունելով «Դեղերի մասին» Հայաստանի Հանրապետության օրենքի 24-րդ հոդվածի 10-րդ մասը

ՀՐԱՄԱՅՈՒՄ ԵՄ

1. Հաստատել մատակարարի պատշաճ բաշխման գործունեության համար պատասխանատու անձին ներկայացվող պահանջները՝ համաձայն հավելվածի:

2. Սույն հրամանն ուժի մեջ է մտնում պաշտոնական հրապարակմանը հաջորդող օրը:

Ա. Թորոսյան

Հավելված Հայաստանի Հանրապետության առողջապահության նախարարի 2020 թվականի հունվարի 16-ի N 01-Ն հրամանի

ՄԱՏԱԿԱՐԱՐԻ ՊԱՏՇԱՃ ԲԱՇԽՄԱՆ ԳՈՐԾՈՒՆԵՈՒԹՅԱՆ ՀԱՄԱՐ ՊԱՏԱՍԽԱՆԱՏՈՒ ԱՆՁԻՆ ՆԵՐԿԱՅԱՑՎՈՂ ՊԱՀԱՆՋՆԵՐԸ

1. Սույն պահանջներով սահմանվում են մատակարարի պատշաճ բաշխման գործունեության համար պատասխանատու անձին (այսուհետ` Պատասխանատու անձ), նրա որակավորմանը և փորձառությանը ներկայացվող պահանջները:

2. Պատասխանատու անձը պետք է ունենա դեղագիտական կամ բժշկական կամ քիմիադեղագործական կամ քիմիական կամ դեղատեխնոլոգիական կամ կենսաբանական կամ անասնաբուժական բարձրագույն մասնագիտական կրթություն:

3. Այն դեպքերում, երբ Պատասխանատու անձի բարձրագույն կրթությունը տարբերվում է դեղագետի որակավորումից, ապա այդ պաշտոնում առաջադրվող անձը պետք է ունենա վերապատրաստումը հավաստող փաստաթղթեր՝ դեղային օրենսդրությանը, պատշաճ արտադրական գործունեությանը, պատշաճ բաշխման գործունեությանը, որակի կառավարման համակարգին վերաբերող թեմաներով:

4. Պատասխանատու անձի պաշտոնում նշանակված անձը պետք է ունենա դեղերի մեծածախ իրացման գործունեություն իրականացնող կազմակերպությունում առնվազն երկու տարվա աշխատանքային փորձ վերջին երեք տարվա ընթացքում:

5. Պատասխանատու անձի գործունեությունը դադարեցվում է, եթե Պատասխանատու անձի գործատու մատակարար կազմակերպությունը խախտել է պատշաճ բաշխման գործունեության կանոնները:

6. Սույն պահանջների 5-րդ կետով նախատեսված կարգով Պատասխանատու անձի գործունեության դադարեցումից հետո նա կարող է կրկին հավակնել աշխատանքի Պատասխանատու անձի պաշտոնում, եթե գործունեության դադարեցումից հետո աշխատել է մատակարարի մոտ երեք տարի, որից վեց ամիսը` նշանակումից անմիջապես առաջ: