Հ Ա Մ Ա Ձ Ա Յ Ն Ա Գ Ի Ր

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՄԱՔՍԱՅԻՆ ՎԱՐՉՈՒԹՅԱՆ ԵՎ ՎՐԱՍՏԱՆԻ ՀԱՆՐԱՊԵՏՈՒԹՅԱՆ ՄԱՔՍԱՅԻՆ ԿՈՄԻՏԵԻ ՄԻՋԵՎ ԹՄՐԱՄԻՋՈՑՆԵՐԻ ԵՎ ՀՈԳԵՆԵՐԳՈՐԾՈՂ ՆՅՈՒԹԵՐԻ ԱՊՕՐԻՆԻ ՇՐՋԱՆԱՌՈՒԹՅԱՆ ԴԵՄ ՊԱՅՔԱՐՈՒՄ ՀԱՄԱԳՈՐԾԱԿՑՈՒԹՅԱՆ ՄԱՍԻՆ

Հայաստանի Հանրապետության մաքսային վարչությունը և Վրաստանի Հանրապետության մաքսային կոմիտեն, այսուհետ` Կողմեր,

հաշվի առնելով թմրամիջոցների և հոգեներգործող նյութերի ապօրինի շրջանառության կանխման գործում մաքսային մարմինների դերը, ձգտելով զարգացնել այդ բնագավառում փոխհամագործակցությունը,

համաձայնեցին ներքոհիշյալի մասին.

ՀՈԴՎԱԾ 1

Կողմերը, իրենց մեջ գործող օրենքներն ու կանոնները պահպանելու պայմանով, սույն Համաձայնագրի սահմաններում կհամագործակցեն թմրամիջոցների և հոգեներգործող նյութերի ապօրինի շրջանառությունը կանխելու և հետաքննելու բնագավառում:

ՀՈԴՎԱԾ 2

Կողմերը կփոխանակեն`

ա) տեղեկություններ թմրամիջոցների ապօրինի շրջանառության դեմ պայքարի մեթոդների մասին,

բ) տեխնիկական միջոցների օգտագործման փորձը,

գ) մասնագետներ` թմրամիջոցների ապօրինի շրջանառության դեմ պայքարի մեթոդները ուսուցանելու նպատակով,

դ) թմրամիջոցների ապօրինի շրջանառության դեմ պայքարի հարցերի վերաբերյալ գիտական հրատարակություններ և ուսումնական ձեռնարկներ,

ե) տեղեկություններ թմրամիջոցների արտադրության նոր ձևերի և տեղերի, տեղափոխման երթուղիների ու դրանց թաքցնելու միջոցների մասին,

զ) թմրամիջոցների և հոգեներգործող նյութերի նույնացման և լաբորատոր հետազոտության բնագավառում տեղեկություններ:

ՀՈԴՎԱԾ 3

Կողմերը փոխանակում են տեղեկություններ`

ա) թմրամիջոցների և հոգեներգործող նյութերի ապօրինի շրջանառությամբ զբաղվող կասկածելի կամ հայտնի անձանց մասին,

բ) փոխադրամիջոցների, բեռների և փոստային առաքումների վերաբերյալ, որոնք օգտագործվում են թմրամիջոցների և հոգեներգործող նյութերի ապօրինի շրջանառության մեջ` տարանցիկ անցնելով Կողմերից մեկի տարածքով մյուսը:

ՀՈԴՎԱԾ 4

Իրենց իրավասությունների և տեխնիկական հնարավորությունների շրջանակներում Կողմերը կիրագործեն հսկողություն.

թմրամիջոցների և հոգեներգործող նյութերի ապօրինի շրջանառության մեջ մասնակիցների և կասկածյալների նկատմամբ,

ապօրինի շրջանառության մեջ օգտագործման համար կասկածելի բեռների, փոխադրամիջոցների և փոստային առաքումների նկատմամբ:

Հսկողության արդյունքները հայտնվում են մյուս Կողմին:

ՀՈԴՎԱԾ 5

Կողմերը կհամագործակցեն վերահսկելի առաքումների և այլ համանման մեթոդների իրականացման բնագավառում:

Վերահսկելի առաքումների օգտագործման մասին որոշումներն ընդունվում են յուրաքանչյուր առանձին դեպքում Կողմերի գործող օրենսդրությանը համապատասխան:

ՀՈԴՎԱԾ 6

Կողմերը կձեռնարկեն բոլոր միջոցները` Կողմերի պետությունների դատական և քննչական մարմիններին տրամադրելու նյութեր, փորձագիտական եզրակացություններ և հայտնաբերված փաստերի մասին այլ տեղեկություններ:

ՀՈԴՎԱԾ 7

Կողմերի միջև գրագրությունը կտարվի ռուսերենով:

Տեղեկությունների փոխանակում կիրականացվի կապի հետևյալ միջոցներով.

Հայաստանի Հանրապետությունում` Հայաստանի Հանրապետության մաքսային վարչության կազմատեսչական բաժնի,

Վրաստանի Հանրապետությունում` Վրաստանի Հանրապետության մաքսային կոմիտեի մաքսանենգության և մաքսային իրավախախտումների դեմ պայքարի վարչության:

Կապի միջոցների որևէ փոփոխության մասին Կողմերը տեղեկացնում են միմյանց:

ՀՈԴՎԱԾ 8

Սույն Համաձայնագիրն ուժի մեջ է մտնում այն ստորագրելու օրվանից:

Սույն Համաձայնագիրը կնքվում է հինգ տարի ժամանակով, նրա ուժի մեջ մտնելու օրվանից հաշված, և ամեն անգամ ինքնաբերաբար երկարաձգվում է հաջորդ հնգամյա ժամանակահատվածի համար, եթե Կողմերից մեկը հնգամյա ժամանակահատվածի լրանալուց վեց ամիս առաջ գրավոր չի տեղեկացնում նրա գործողությունը դադարեցնելու իր ցանկության մասին:

Կատարված է Երևան քաղաքում 1993 թվականի մայիսի 19-ին, երկու օրինակով, յուրաքանչյուրը` հայերեն և վրացերեն, ընդ որում երկու բնօրինակներն էլ հավասարազոր են:

Համաձայնագիրն ուժի մեջ է մտել 1993 թվականի մայիսի 19-ից: