Հ Ա Մ Ա Ձ Ա Յ Ն Ա Գ Ի Ր

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԱՐԴԱՐԱԴԱՏՈՒԹՅԱՆ ՆԱԽԱՐԱՐՈՒԹՅԱՆ ԵՎ ՎՐԱՍՏԱՆԻ ԱՐԴԱՐԱԴԱՏՈՒԹՅԱՆ ՆԱԽԱՐԱՐՈՒԹՅԱՆ ՄԻՋԵՎ ԴԱՏԱԿԱՆ ՓՈՐՁԱՔՆՆՈՒԹՅԱՆ ԲՆԱԳԱՎԱՌՈՒՄ ՀԱՄԱԳՈՐԾԱԿՑՈՒԹՅԱՆ ՄԱՍԻՆ

Հայաստանի Հանրապետության արդարադատության նախարարությունը և Վրաստանի արդարադատության նախարարությունը, այսուհետև` Կողմեր,

ձգտելով կապեր հաստատել դատական փորձաքննության բնագավառում և համարելով, որ բարեկամության և փոխշահավետ համագործակցության առկա հարաբերությունների ամրապնդումը համապատասխանում է երկու երկրների ազգային շահերին,

իրավունքի և իրավակիրառական պրակտիկայի բնագավառում համագործակցության զարգացման միջոցով հարաբերությունների հետագա ամրապնդման նպատակով,

համաձայնեցին ներքոհիշյալի մասին.

Հոդված 1

Կողմերը համագործակցություն են իրականացնում դատական փորձաքննության տեսական և մեթոդական խնդիրների մշակման ուղղությամբ գիտահետազոտական աշխատանքների, փորձագիտական պրոֆիլակտիկայի արդյունավետության, փորձագիտական հետազոտության գոյություն ունեցող մեթոդների և մեթոդիկաների կատարելագործման և նորերի ստեղծման, փորձագիտական պրակտիկայի փորձի փոխանակման բնագավառներում:

Հոդված 2

Համագործակցություն իրականացնելիս կողմերը միմյանց հետ հաղորդակցվում են անմիջականորեն և`

հայկական Կողմից` Հայաստանի Հանրապետության արդարադատության նախարարության փորձաքննության կենտրոնի և

վրացական Կողմից` Վրաստանի արդարադատության նախարարության փորձաքննության և հատուկ հետազոտությունների կենտրոնի միջոցով:

Հոդված 3

Կողմերը դատական փորձաքննության բնագավառում համագործակցությունը կզարգացնեն իրենց իրավասությանն առնչվող գործունեության հետևյալ ուղղություններով.

• դատական փորձաքննության խնդիրներով գիտական աշխատանքի համակարգում, մեթոդների և մեթոդիկաների համատեղ մշակում,
• տեղեկատվական-տեղեկատու գործունեության բնագավառի տվյալների փոխանակում,
• նոր մեթոդների և մեթոդիկաների յուրացման համար համատեղ սեմինարների, դասընթացների անցկացում,
• փորձագիտական և գիտական կադրերի պատրաստման և որակավորման բարձրացման բնագավառում համագործակցություն,
• գիտական մշակումների և փորձագիտական եզրակացությունների գրախոսում,
• մեթոդական և գիտական գրականության փոխանակում
• գիտական և փորձագիտական գործունեության հարցերով միմյանց գիտամեթոդական և գործնական օգնության ցուցաբերում,
• մասնագետների փոխանակում` ստաժավորում անցկացնելու համար:

Հոդված 4

Կողմերը, փոխադարձ պայմանավորվածությամբ, կաջակցեն սույն Համաձայնագրով չնախատեսված, բայց Հայաստանի Հանրապետության և Վրաստանի միջև դատական փորձաքննության բնագավառում համագործակցության զարգացման նպատակներին համապատասխանող միջոցառումներին:

Հոդված 5

Սույն Համաձայնագրի գործողության հետ կապված պարտավորությունները Կողմերը պարտավորվում են կատարել անհատույց` գիտատեխնիկական օգնության կարգով:

Հոդված 6

Սույն համաձայնագիրը կարող է փոփոխվել և լրացվել գրավոր` Կողմերի փոխադարձ համաձայնությամբ:

Փոփոխությունները և լրացումները ձևակերպվում են արձանագրություններով, որոնք սույն Համաձայնագրի անբաժանելի մասն են:

Սույն Համաձայնագրի գործողության ոլորտին առնչվող հարցերով Կողմերի միջև վեճերը և տարաձայնությունները կլուծվեն երկկողմ բանակցությունների և խորհրդակցությունների միջոցով:

Հոդված 7

Սույն Համաձայնագիրն ուժի մեջ է մտնում Համաձայնագրի ուժի մեջ մտնելու համար անհրաժեշտ ներպետական ընթացակարգերի կատարման մասին վերջին ծանուցագիրը ստանալու օրվանից և գործում է սույն Համաձայնագրի գործողությունը դադարեցնելու վերաբերյալ մի Կողմի մտադրության մասին գրավոր ծանուցումը մյուս Կողմի ստանալու օրվանից վեց ամիս լրանալուց հետո:

Կատարված է 2001 թվականի հոկտեմբերի 23-ին, Երևան քաղաքում, երկու օրինակով, յուրաքանչյուրը` հայերեն, վրացերեն և ռուսերեն, ընդ որում` բոլոր տեքստերը հավասարազոր են:

Սույն Համաձայնագրի դրույթները կիրառելիս գերակայությունը տրվում է ռուսերեն լեզվով տեքստին:

Համաձայնագիրն ուժի մեջ է մտել 04.03.2005թ.