Հ Ա Մ Ա Ձ Ա Յ Ն Ա Գ Ի Ր

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՄՇԱԿՈՒՅԹԻ ԵՎ ԵՐԻՏԱՍԱՐԴՈՒԹՅԱՆ ՀԱՐՑԵՐԻ ՆԱԽԱՐԱՐՈՒԹՅԱՆ ԵՎ ԷՍՏՈՆԻԱՅԻ ՀԱՆՐԱՊԵՏՈՒԹՅԱՆ ՄՇԱԿՈՒՅԹԻ ՆԱԽԱՐԱՐՈՒԹՅԱՆ ՄԻՋԵՎ ՄՇԱԿՈՒՅԹԻ ԲՆԱԳԱՎԱՌՈՒՄ ՀԱՄԱԳՈՐԾԱԿՑՈՒԹՅԱՆ ՄԱՍԻՆ

Հայաստանի Հանրապետության մշակույթի և երիտասարդության հարցերի նախարարությունը և Էստոնիայի Հանրապետության մշակույթի նախարարությունը (այսուհետ` Կողմեր),

ցանկանալով ամրապնդել և զարգացնել համագործակցությունը արվեստի և մշակույթի բնագավառում,

համաձայնեցին հետևյալի մասին.

Հոդված 1

Կողմերը, սույն Համաձայնագրին և իրենց երկրների ներքին օրենսդրությանը համապատասխան, կիրականացնեն համագործակցություն մշակույթի բնագավառում, կզարգացնեն սույն Համաձայնագրով նախատեսված համագործակցությունը և տեղեկատվության փոխանակումը` մասնավորապես խրախուսելով.

փոխանակումները գրականության, կերպարվեստի և կիրառական արվեստի, երաժշտության, պարի, թատերգության և կինոարվեստի բնագավառներում,

մասնակցությունը մյուս Կողմի կազմակերպած միջազգային փառատոներին:

Հոդված 2

Կողմերը կխրախուսեն ուղղակի համագործակցությունը մշակութային հասարակական կազմակերպությունների, թանգարանների, գրադարանների, արխիվների և այլ մշակութային հաստատությունների միջև:

Հոդված 3

Կողմերը կկազմակերպեն երկկողմ սեմինարներ, սիմպոզիումներ և համաժողովներ, որոնցում կընդգրկվեն մշակութային ժառանգության պահպանման խնդիրներով զբաղվող փորձագետներ, կնպաստեն ժառանգության պահպանության ոլորտում համագործակցության այլ ձևերին (ներառյալ մշակութային ժառանգության առարկաների ապօրինի ներմուծումը և արտահանումը կանխելը)` իրենց երկրներում գործող օրենսդրության համաձայն:

Հոդված 4

Կողմերը կօժանդակեն իրենց ներկայացուցիչների մասնակցությանը մյուս Կողմի կազմակերպած` մշակութային խնդիրներին նվիրված միջազգային համաժողովներին, հանդիպումներին և մրցույթներին:

Հոդված 5

Կողմերը կպաշտպանեն հեղինակային և հարակից իրավունքները մշակույթի և արվեստի բնագավառում` իրենց երկրներում գործող օրենսդրությանը համապատասխան:

Հոդված 6

Կողմերը սույն Համաձայնագրի գործնական իրականացման հետ կապված խնդիրները կարգավորելու նպատակով կստեղծեն համատեղ հանձնաժողով` բաղկացած իրենց հավասար թվով ներկայացուցիչներից, որի նիստերը՝ ըստ անհրաժեշտության և Կողմերի միջև համաձայնեցված ժամկետներում, կգումարվեն Երևանում և Տալլինում:

Համատեղ հանձնաժողովը կգործի իր կողմից հաստատված կանոնների համաձայն:

Հոդված 7

Սույն Համաձայնագրի իրականացման նպատակով Կողմերը կարող են մշակել փոխանակման կարճաժամկետ ծրագրեր, որոնք կներառեն կոնկրետ գործողություններ, ինչպես նաև կազմակերպչական և ֆինանսական պայմաններ:

Հոդված 8

Կողմերը համաձայնում են, որ սույն Համաձայնագիրը չի բացառում համագործակցության այլ ձևերի հնարավորությունը, որոնք նշված չեն Համաձայնագրում, բայց համապատասխանում են նրա նպատակներին:

Հոդված 9

Սույն Համաձայնագիրն ուժի մեջ է մտնում յուրաքանչյուր Կողմի ազգային օրենսդրությամբ նախատեսված ներքին ընթացակարգերն ավարտելու մասին Կողմերի միմյանց գրավոր ծանուցելու օրվանից:

Սույն Համաձայնագիրը ուժի մեջ կմնա մինչև Կողմերի կողմից գրավոր դադարեցվելը՝ այդպիսի մտադրության մասին ծանուցելուց վեց ամիս հետո:

Կատարված է Երևան քաղաքում 2004 թվականի նոյեմբերի 14-ին, երկու բնօրինակով, յուրաքանչյուրը՝ հայերեն, էստոներեն և անգլերեն. ընդ որում` բոլոր տեքստերն էլ հավասարազոր են: Սույն Համաձայնագրի մեկնաբանման ընթացքում որևէ տարաձայնություն առաջանալու դեպքում նախապատվությունը կտրվի անգլերեն տեքստին:

Համաձայնագիրն ուժի մեջ է մտել 10.06.2005թ.