ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԱԶԳԱՅԻՆ ԺՈՂՈՎԻ
Ո Ր Ո Շ ՈՒ Մ Ը
1999 ԹՎԱԿԱՆԻ ՀՈԿՏԵՄԲԵՐԻ 27-Ի ԳՈՐԾԻ ՔՆՆՈՒԹՅԱՆ ԸՆԹԱՑՔՈՒՄ ՄԵՂԱԴՐՅԱԼՆԵՐԻ, ԻՆՉՊԵՍ ՆԱԵՎ ԱՄԲԱՍՏԱՆՅԱԼՆԵՐԻ ՊԱՀՊԱՆՈՒԹՅՈՒՆՆ ԻՐԱԿԱՆԱՑՆՈՂ ՄԱՐՄԻՆՆԵՐԻ ԳՈՐԾՈՒՆԵՈՒԹՅԱՆ ՕՐԻՆԱԿԱՆՈՒԹՅՈՒՆՆ ՈՒՍՈՒՄՆԱՍԻՐՈՂ ԺԱՄԱՆԱԿԱՎՈՐ ՀԱՆՁՆԱԺՈՂՈՎ ՍՏԵՂԾԵԼՈՒ ՄԱՍԻՆ
Ղեկավարվելով Հայաստանի Հանրապետության Սահմանադրության 73-րդ հոդվածի երրորդ մասով և Հայաստանի Հանրապետության Ազգային ժողովի կանոնակարգի 44-րդ հոդվածի առաջին մասով` Հայաստանի Հանրապետության Ազգային ժողովը որոշում է.
1. Ստեղծել ժամանակավոր հանձնաժողով` 1999 թվականի հոկտեմբերի 27-ի գործի քննության ընթացքում մեղադրյալների, ինչպես նաև ամբաստանյալների պահպանությունն իրականացնող մարմինների գործունեության օրինականության մասին Ազգային ժողով եզրակացություն (տեղեկանք) ներկայացնելու համար:
2. Հանձնաժողովի առջև դնել հետևյալ խնդիրները`
ա) պարզել մեկուսարաններում, իսկ դատավարության ժամանակ նաև դատարանի շենքում ամբաստանյալների պահպանությունն իրականացնող մարմինների, պաշտոնատար անձանց գործողությունների համապատասխանությունն օրենքների, նորմատիվ իրավական ակտերի պահանջներին, և այդ մասին եզրակացություն (տեղեկանք) ներկայացնել Ազգային ժողով.
բ) քննության նյութերի ուսումնասիրության հիման վրա պարզել Նաիրի Հունանյանի` Հայաստանի Հանրապետության ազգային անվտանգության նախարարության մեկուսարանում պահելու օրինականության և նպատակահարմարության հարցը, և այդ մասին եզրակացություն (տեղեկանք) ներկայացնել Ազգային ժողով.
գ) պարզել, թե ինչ միջոցներ են ձեռնարկվել մեկուսարանում կալանավոր Նորայր Եղիազարյանի` 2000 թվականի օգոստոսի 29-ին տեղի ունեցած մահվան կապակցությամբ, ստուգել դրանց համապատասխանությունը նորմատիվ իրավական ակտերի պահանջներին, և այդ մասին եզրակացություն (տեղեկանք) ներկայացնել Ազգային ժողով:
3. Հանձնաժողովին իրավունք վերապահել`
ա) ծանոթանալ քրեական գործով ձերբակալված և կալանավորված անձանց պահպանությունն ու տեղափոխությունը կարգավորող բոլոր նորմատիվ իրավական ակտերին.
բ) մուտք գործել մեկուսարանների և դատարանի այն տարածքները, որտեղ պահվում են ամբաստանյալները.
գ) ծանոթանալ 1999 թվականի հոկտեմբերի 27-ի գործով ձերբակալված և կալանավորված անձանց տեսակցությունների, ինչպես նաև նրանց համար ծանրոցներ, սննդամթերք, հագուստ և այլ առարկաներ ընդունելու հետ կապված գործողությունների փաստաթղթային ձևակերպումներին.
դ) ծանոթանալ վերոհիշյալ գործով ձերբակալված և կալանավորված բոլոր անձանց անձնական գործերին և փաստաթղթերին` նրանց մեկուսարանում գտնվելու օրվանից մինչև ստուգման օրն ընկած ժամանակահատվածում.
ե) մեկուսարանի աշխատակիցներից պարզաբանումներ և տեղեկատվություն ստանալ համապատասխան նորմատիվ իրավական ակտերի պահանջների պահպանման վիճակի մասին.
զ) իր գործունեությունն իրականացնելիս ներգրավել մասնագետների և փորձագետների:
4. Հանձնաժողովը ստեղծել հետևյալ կազմով` երեք պատգամավոր «Միասնություն» խմբակցությունից և մեկական պատգամավոր մյուս խմբակցություններից, պատգամավորական խմբերից և անկախ պատգամավորներից:
5. Պատգամավորները հանձնաժողովի կազմում ընդգրկվում են համապատասխան խմբակցության, պատգամավորական խմբի որոշմամբ` ղեկավարի ներկայացմամբ:
6. Հանձնաժողովի կազմում ընդգրկելու համար խմբակցության կամ պատգամավորական խմբի կազմում չընդգրկված պատգամավորների թեկնածությունները Ազգային ժողովի նիստում առաջադրում են պատգամավորները: Ընտրված է համարվում այն պատգամավորը, որն էլեկտրոնային համակարգի միջոցով կազմակերպված քվեարկության արդյունքներով ստանում է առավել շատ ձայներ:
7. Հանձնաժողովի նիստն իրավազոր է, եթե դրան ներկա է անդամների կեսից ավելին: Հանձնաժողովի որոշումներն ընդունվում են նիստին ներկա անդամների ձայների մեծամասնությամբ:
8. Հանձնաժողովի գործունեության ժամկետը սահմանվում է մինչև վեց ամիս: Հանձնաժողովն իր գործունեության արդյունքների մասին Ազգային ժողովին զեկուցում է մինչև 2001 թվականի նոյեմբերի 22-ը, իսկ մինչ այդ պարբերաբար, բայց ոչ պակաս, քան երկու ամիսը մեկ, հանդես է գալիս հաղորդումներով:
9. հանձնաժողովն իրավասու է հարցումներով դիմել համապատասխան մարմիններ և նրանցից ստանալ անհրաժեշտ տեղեկություններ:
|
ՀայաՍՏԱՆԻ հԱՆՐԱՊԵՏՈՒԹՅԱՆ |
Ա. Խաչատրյան |
|
|
| Փոփոխող ակտ | Համապատասխան ինկորպորացիան |
|---|
| Փոփոխող ակտ | Համապատասխան ինկորպորացիան |
|---|