Հայաստանի Հանրապետության տարածքում գործող բանկերի լուծարման

1. ՀՀ տարածքում գործող բանկը կարող է լուծարվել`

ա) բանկի կառավարման բարձրագույն մարմնի որոշմամբ.

բ) ՀՀ կենտրոնական բանկի կողմից բանկային գործառնություններ իրականացնելու համար տրված արտոնագիրը անվավեր ճանաչելու դեպքում.

գ) ՀՀ օրենսդրությամբ նախատեսված այլ դեպքերում:

2. Բանկի կառավարման բարձրագույն մարմնի որոշմամբ բանկի գործունեության դադարեցումը իրականացվում է ՀՀ օրենսդրությանը և բանկի կանոնադրությանը համապատասխան:

3. Բանկի կառավարման բարձրագույն մարմնի կողմից բանկի գործունեության դադարեցման դեպքում լուծարային հանձնաժողով նշանակում են բանկի հիմնադիրները կամ բաժնետերերը` դրա կազմում պարտադիր ընդգրկելով Հայաստանի Հանրապետության կենտրոնական բանկի լիազոր ներկայացուցչին:

4. ՀՀ կենտրոնական բանկի կողմից բանկային գործառնություններ իրականացնելու համար տրված արտոնագիրն անվավեր ճանաչելու դեպքում լուծարային հանձնաժողովը նշանակվում է ՀՀ կենտրոնական բանկի առաջարկությամբ` բանկի կառավարման բարձրագույն մարմնի որոշմամբ: Արտոնագիրը անվավեր ճանաչելու օրվանից մեկ ամսվա ընթացքում լուծարային հանձնաժողով չնշանակելու դեպքում` այն նշանակվում է Հայաստանի Հանրապետության կենտրոնական բանկի կողմից:

5. Բանկի լուծարման մասին որոշում ընդունելու, ինչպես նաև արտոնագիրը անվավեր ճանաչելու պահից դադարեցվում է բանկի կողմից գործառնությունների իրականացումը, բացառությամբ այն գործառնությունների, որոնք կապված են բանկի նկատմամբ եղած պարտավորությունների կատարման հետ:

6. Լուծարային հանձնաժողովի անդամների թիվը պետք է լինի 3 հոգուց ոչ պակաս:

7. Լուծարային հանձնաժողով նշանակելու պահից բանկի կառավարման բոլոր լիազորություններն անցնում են լուծարային հանձնաժողովին:

8. Լուծարային հանձնաժողովի գործունեության նպատակն է լուծարվող բանկի ակտիվների շահավետ իրացման միջոցով առավելագույն չափով կատարել պարտավորությունները վարկատուների և ավանդատուների նկատմամբ:

9. Բանկի լուծարման վերաբերյալ որոշում ընդունելուց հետո լուծարային հանձնաժողովը 3 օրվա ընթացքում հայտարարություն է հրապարակում մամուլում:

10. Լուծարային հանձնաժողովը գործունեության ընթացքում իրականացնում է հետևյալ միջոցառումները`

ա) սահմանում է ժամկետ, որի ընթացքում բոլոր ավանդատուները և վարկատուները ներկայացնում են լուծարման վերաբերյալ որոշում ընդունելու օրվա դրությամբ իրենց պահանջները հիմնավորող փաստաթղթերը.

բ) գնահատում է բանկի ակտիվները և պասիվները.

գ) գնահատում է տրված վարկերի ապահովման դիմաց վերցված նյութական արժեքները և վարկը չվերադարձնելու դեպքում միջոցներ է ձեռնարկում դրանց իրացման նպատակով.

դ) հայտնաբերում է բանկի պարտապաններին և սահմանում է վարկերի վաղաժամկետ գանձման կարգը.

ե) միջոցներ է ձեռնարկում բանկի ակտիվները առավել շահավետ իրացնելու համար: Այդ նպատակով հանձնաժողովը կարող է իրականացնել ակտիվների աճուրդային վաճառք:

11. Լուծարային հանձնաժողովի կողմից պարտքերի մարումը կատարվում է հետևյալ հերթականությամբ`

ա) լուծարային հանձնաժողովի ծախսերի հատուցում և աշխատավարձի վճարում` համաձայն հաստատված նախահաշվի.

բ) ավանդատուների նկատմամբ պարտավորությունների կատարում.

գ) բյուջեի վճարումներ.

դ) լուծարման հետևանքով առաջացած բնակչության զբաղվածության ֆոնդի վճարումներ.

ե) կատարվող հերթական վճարումներ` ՀՀ օրենսդրությամբ սահմանված կարգով.

զ) բանկի աշխատողների աշխատավարձի և կենսաթոշակային ֆոնդին կատարվող վճարումներ.

է) վարկատուների պահանջների բավարարում.

ը) երրորդ անձանց նկատմամբ բանկի ունեցած պարտքերի և պարտավորությունների մարում.

թ) լուծարային հանձնաժողովի որոշմամբ բանկի այլ պարտավորությունների կատարում:

Մնացած դրամական միջոցները, ներառյալ բանկի գույքի իրացումից ստացված հասույթը, բաշխվում են հիմնադիրների (մասնակիցների), բաժնետերերի միջև` բանկի կանոնադրությամբ սահմանված կարգով:

12. ՀՀ կենտրոնական բանկում բացված լուծարվող բանկի թղթակցային հաշվի տնօրինումն անցնում է լուծարային հանձնաժողովին: Եթե լուծարվող բանկն ունի թղթակցային հաշիվներ այլ բանկերում և մասնաճյուղերի առկայության դեպքում` հաշիվներում մնացորդներ, ապա այդ հաշիվների մնացորդները նույնպես փոխանցվում են ՀՀ կենտրոնական բանկում բացված հաշվին: Այդ հաշվին են փոխանցվում նաև ՀՀ կենտրոնական բանկում պարտադիր պահուստավորված միջոցները:

13. Առևտրային բանկի թղթակցային հաշիվը տնօրինելու համար լուծարային հանձնաժողովը ՀՀ կենտրոնական բանկ է ներկայացնում`

ա) լուծարային հանձնաժողով նշանակելու վերաբերյալ համապատասխան մարմնի որոշումը.

բ) հաշիվը տնօրինելու վերաբերյալ միջնորդագիր` հանձնաժողովի նախագահի ստորագրությամբ.

գ) ստորագրությունների նմուշներով և կնիքի դրոշմվածքով քարտ:

14. Այդ հաշվից գործառնություններ կատարելու համար առաջին ստորագրության իրավունքը տրվում է լուծարային հանձնաժողովի նախագահին, իսկ երկրորդ ստորագրությանը` նախագահի կողմից լիազորված հանձնաժողովի որևէ անդամի:

Ստորագրությունների նմուշի քարտը վավերացվում է նոտարի կողմից:

Որպես կնիքի դրոշմվածք կարող է օգտագործվել լուծարվող բանկի կնիքը:

15. Աշխատանքների լրիվ ավարտից հետո լուծարային հանձնաժողովի հաշիվը փակվում է:

16. Լուծարային հանձնաժողովը ՀՀ կենտրոնական բանկ է ներկայացնում լուծարման վերաբերյալ վերջնական հաշվետվություն (ակտ):

17. Բանկը համարվում է լուծարված` լուծարային հանձնաժողովի աշխատանքների ավարտից հետո ՀՀ կենտրոնական բանկի գրանցման մատյանում լուծարման վերաբերյալ համապատասխան գրառման կատարման պահից: Բանկի լուծարման վերաբերյալ տեղեկությունը հրապարակվում է մամուլում: