ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

Ո Ր Ո Շ ՈՒ Մ

11 սեպտեմբերի 2025 թվականի N 1291-Ա

ՊԵՏԱԿԱՆ ԳՈՒՅՔԸ ՄԱՍՆԱՎՈՐԵՑՆԵԼՈՒ ՄԱՍԻՆ

Հիմք ընդունելով «Պետական գույքի մասնավորեցման (սեփականաշնորհման) մասին» օրենքի 3-րդ հոդվածի 2-րդ մասի «բ» կետը, 12-րդ հոդվածի «դ» կետը, 14-րդ հոդվածի 1-ին մասի «բ» կետն ու 2-րդ մասը, 16-րդ և 21-րդ հոդվածները՝ Հայաստանի Հանրապետության կառավարությունը որոշում է.

1. Թույլատրել Հայաստանի Հանրապետության տարածքային կառավարման և ենթակառուցվածքների նախարարության պետական գույքի կառավարման կոմիտեին իր տնօրինության «Գագարինի արտադրական բազա» փակ բաժնետիրական ընկերության լուծարումից հետո մնացած՝ Հայաստանի Հանրապետության Գեղարքունիքի մարզ, Սևան համայնք, Գագարին գյուղ, Գործարանային փողոց թիվ 4 հասցեում (անշարժ գույքի նկատմամբ իրավունքների պետական գրանցման N 15112022- 05-0050 վկայական) գտնվող՝ 1106.68 քառ. մետր ընդհանուր մակերեսով շենք-շինությունները, դրանց օգտագործման ու սպասարկման համար հատկացված 1.95 հա մակերեսով հողամասը (այսուհետ՝ անշարժ գույք), ջրագիծը և տրանսֆորմատորը (այսուհետ՝ շարժական գույք)՝ ամբողջը որպես մեկ գույքային միավոր (այսուհետ՝ գույքային միավոր), մասնավորեցնել դասական աճուրդով:

2. Գույքային միավորի՝ Հայաստանի Հանրապետության կառավարության 1998 թվականի մարտի 27-ի N 209 որոշմամբ սահմանված կարգով 2025 թվականի հուլիսի 8-ին (գնահատման պահ) գնահատված արժեքը կազմում է 73,866.0 հազ. դրամ, որից անշարժ գույք՝ 73,100.0 հազ. դրամ (ներառյալ հողամասի գնահատված շուկայական արժեքը՝ 52,300.0 հազ. դրամ, այդ թվում՝ հողամասի գնահատման պահին գործող շուկայական արժեքին մոտարկված կադաստրային արժեքը՝ 23,809.5 հազ. դրամ) և շարժական գույք՝ 766.0 հազ. դրամ։

3. Սահմանել՝

1) աճուրդով մասնավորեցման ենթակա գույքային միավորի մեկնարկային գինը՝ գնահատված արժեքի 100 տոկոսը՝ 73,866.0 հազ. դրամ.

2) աճուրդի մասնակցության նախավճարը՝ աճուրդով մասնավորեցման ենթակա գույքային միավորի մեկնարկային գնի 20 տոկոսի չափով՝ 14,773.2 հազ. դրամ: Աճուրդի հաղթողի կողմից մուծված նախավճարը ներառվում է առաջարկվող գնի մեջ.

3) որ, աճուրդի արդյունքում գնորդի առաջարկած գինը սահմանված կարգով ենթակա է վճարման աճուրդի արձանագրությունն ստորագրելուց հետո երեք աշխատանքային օրվա ընթացքում.

4) որ, գնորդը պարտավոր է վճարել նաև գույքային միավորի արժեքի որոշման ծառայություների վճարը՝ 592.6 հազ. դրամ (ներառյալ ավելացված արժեքի հարկը), որը ենթակա է վճարման աճուրդի արդյունքների մասին արձանագրությունն ստորագրելուց հետո երեք աշխատանքային օրվա ընթացքում՝ 900018002981 գանձապետական հաշվին ու չի ներառվում աճուրդի արդյունքում գնորդի առաջարկած գնի մեջ:

4. Հայաստանի Հանրապետության կառավարության 2023 թվականի սեպտեմբերի 28-ի N 1667-Ն որոշմամբ հաստատված կարգի (այսուհետ՝ կարգ) 29-րդ կետի 2-4-րդ ենթակետերում նշված դեպքերում էլեկտրոնային աճուրդը չկայանալու ժամանակ նախավճարը չի վերադարձվում և փոխանցվում է Հայաստանի Հանրապետության պետական բյուջե:

5. Հայաստանի Հանրապետության տարածքային կառավարման և ենթակառուցվածքների նախարարության պետական գույքի կառավարման կոմիտեի նախագահին`

1) սույն որոշումն ուժի մեջ մտնելուց հետո եռամսյա ժամկետում կազմակերպել և անցկացնել երկու էլեկտրոնային աճուրդ Հայաստանի Հանրապետության կառավարության 2023 թվականի սեպտեմբերի 28-ի N 1667-Ն որոշմամբ հաստատված կարգի համաձայն, ընդ որում՝ երկրորդ աճուրդն անցկացնել առաջին աճուրդը չկայանալու դեպքում՝ 1 ամսվա ընթացքում՝ նույն պայմաններով.

2) աճուրդների անցկացման օրվանից առնվազն 15 օր առաջ մամուլում և զանգվածային լրատվության այլ միջոցներով, Հայաստանի Հանրապետության հրապարակային ծանուցումների www.azdarar.am պաշտոնական ինտերնետային կայքում և Պետական գույքի կառավարման կոմիտեի էլեկտրոնային կայքում՝ www.e-auction.am տեղադրել ընդհանուր տեղեկություններ անշարժ և շարժական գույքի, աճուրդների անցկացման պայմանների, ժամկետների, աճուրդների մասնակիցներին ներկայացվող պահանջների մասին.

3) աճուրդի հաղթողի (այսուհետ` գնորդ) կողմից սույն որոշման 3-րդ կետի 3-րդ և 4-րդ ենթակետերով նախատեսված վճարումներն իրականացնելուց հետո` Հայաստանի Հանրապետության օրենսդրությամբ սահմանված կարգով մեկամսյա ժամկետում գնորդի հետ կնքել մասնավորեցման պայմանագիր` դրանում նախատեսելով, որ գնորդը պարտավորվում է իր միջոցների հաշվին վճարել պայմանագրի նոտարական վավերացման և գույքային իրավունքների պետական գրանցման համար օրենքով սահմանված գումարներն ու տուրքերը:

6. Սահմանել, որ գնորդը վճարումները կատարում է Հայաստանի Հանրապետության արժույթով, ընդ որում, աճուրդում առաջարկած գնի՝ նվազեցված շարժական գույքի (գնի բարձրացման դեպքում պահպանվում է շարժական գույքի շուկայական արժեքի համամասնությունը) արժեքի չափով՝ 70 տոկոսն ուղղելով Հայաստանի Հանրապետության պետական բյուջե, 30 տոկոսը` համապատասխան համայնքի ֆոնդային բյուջե՝ ըստ գույքի գտնվելու վայրի, իսկ շարժական գույքի արժեքն ամբողջությամբ՝ համապատասխան գանձապետական հաշվին։

Հայաստանի Հանրապետության վարչապետ	Ն. Փաշինյան
Երևան

11.09.2025 ՀԱՎԱՍՏՎԱԾ Է ԷԼԵԿՏՐՈՆԱՅԻՆ ՍՏՈՐԱԳՐՈՒԹՅԱՄԲ