ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

ԱՐԴԱՐԱԴԱՏՈՒԹՅԱՆ ՆԱԽԱՐԱՐ

22 հունիսի 2023 թ. քաղ. Երևան

N 333-Ն

Հ Ր Ա Մ Ա Ն

Ղեկավարվելով «Հաշտարարության մասին» օրենքի 9-րդ հոդվածի 7.1-ին և 7.2-րդ մասերով.

ՀՐԱՄԱՅՈՒՄ ԵՄ՝

1. Սահմանել արտոնագրված հաշտարարի թեկնածուի ընտրության և նշանակման կարգը՝ համաձայն N 1 հավելվածի:

2. Սահմանել հաշտարար նշանակելու վերաբերյալ դիմումի տիպային ձևը՝ համաձայն N 2 հավելվածի:

3. Սահմանել հաշտարարի թեկնածու առաջարկելու վերաբերյալ պահանջագրի տիպային ձևը՝ համաձայն N 3 հավելվածի:

4. Սույն հրամանն ուժի մեջ է մտնում պաշտոնական հրապարակմանը հաջորդող տասներորդ օրը։

Գ. Մինասյան

Հավելված N 1 Արդարադատության նախարարի 2023 թվականի հունիսի 22-ի N 333-Ն հրամանի

1. Արդարադատության նախարարության (այսուհետ՝ նախարարություն) կողմից օրենքով սահմանված դեպքերում հաշտարարի կամ մշտապես գործող հաշտարարական հաստատության թեկնածուի ընտրությունը կատարվում է հատուկ համակարգչային ծրագրի (այսուհետ՝ ծրագիր) միջոցով կատարվող վիճակահանությամբ:

(1-ին կետը լրաց. 29.12.25 N 882-Ն)

2. Վիճակահանությունը իրականացվում է արտոնագրված հաշտարարների կամ մշտապես գործող հաշտարարական հաստատությունների ռեեստրում հաշվառված և «Հաշտարարության մասին» օրենքի (այսուհետ՝ Օրենք) 17-րդ հոդվածի 3-րդ և 4-րդ մասերին համապատասխան ձևավորված ցանկերից որևէ մեկում ընդգրկված հաշտարարների կամ մշտապես գործող հաշտարարական հաստատությունների թվից, բացառությամբ սույն կարգի 11-րդ կետով սահմանված դեպքերի:

(2-րդ կետը լրաց. 29.12.25 N 882-Ն) 

3. Յուրաքանչյուր հաշտարարի կամ մշտապես գործող հաշտարարական հաստատության ընթացիկ ծանրաբեռնվածությունը որոշելու համար համակարգը ինքնաշխատ եղանակով գեներացնում է ներկայացված դիմումների և պահանջագրերի հիման վրա հաշտարարին մակագրված այն գործերի քանակը, որոնցով հաշտարարն իրականացնում է հաշտարարություն:

(3-րդ կետը լրաց. 29.12.25 N 882-Ն) 

II. ՊԱՀԱՆՋԱԳՐԵՐԻ ԵՎ ԴԻՄՈՒՄՆԵՐԻ ՄՈՒՏՔԱԳՐՈՒՄԸ ԵՎ ՀՐԱՊԱՐԱԿՈՒՄԸ

4. Հաշտարարի թեկնածու ներկայացնելու վերաբերյալ դատարանի պահանջագիրը կամ հաշտարար նշանակելու վերաբերյալ անձի դիմումը ներկայացվում են ծրագրի միջոցով՝ էլեկտրոնային եղանակով: Ծրագրի խափանման դեպքում պահանջագիրը կամ դիմումը կարող են ներկայացվել թղթային եղանակով` կցելով ծրագրի խափանման փաստը հավաստող ապացույցներ: Պահանջագիրը կամ դիմումը թղթային եղանակով ուղարկվելու դեպքում այն ոչ ուշ, քան ստանալու հաջորդ աշխատանքային օրը ծրագիր է մուտքագրվում նախարարության աշխատակցի կողմից:

(4-րդ կետը խմբ. 30.06.25 N 398-Ն)

5. Դատարանի կողմից ներկայացված պահանջագիրը կամ անձի կողմից ներկայացված դիմումը մուտքագրման պահից հասանելի են դառնում ծրագրում և ոչ ուշ, քան ստանալու հաջորդ աշխատանքային օրը հաստատվում են նախարարության աշխատակցի կողմից:

III. ՎԻՃԱԿԱՀԱՆՈՒԹՅԱՆ ԱՆՑԿԱՑՈՒՄԸ

6. Տվյալ օրվա ընթացքում մուտքագրված և նախարարության աշխատակցի կողմից հաստատված պահանջագրերի կամ դիմումների հիման վրա վիճակահանություններն անցկացվում են ծրագրի միջոցով ինքնաշխատ եղանակով` առանց նախարարության միջամտության` ոչ ուշ, քան հաջորդ աշխատանքային օրվա ավարտը:

7. Ծրագիրն իրականացնում է վիճակահանություն՝ հետևյալ սկզբունքներով.

1) վիճակահանությունը կատարվում է պատահականության սկզբունքով՝ ծրագրում ներառված այն հաշտարարների կամ մշտապես գործող հաշտարարական հաստատությունների ցանկից, որոնք տվյալ պահին սպասարկում են նվազ քանակով ընթացիկ գործեր, սպասարկում են համապատասխան դիմումում կամ պահանջագրում նշված տարածքը և ներառված են այդպիսի գործեր քննող հաշտարարների կամ մշտապես գործող հաշտարարական հաստատությունների հատուկ ցանկում: Սույն ենթակետի իմաստով նվազ քանակով ընթացիկ գործեր ունեցող են համարվում այն հաշտարարները կամ մշտապես գործող հաշտարարական հաստատությունները, որոնց կողմից սպասարկվող գործերի քանակը մինչև 5 գործով ավել է տվյալ պահին այդ տարածքում նվազագույն քանակով ընթացիկ գործեր սպասարկող հաշտարարի կամ մշտապես գործող հաշտարարական հաստատության գործերի քանակից,

 2) սույն կետի 1-ին ենթակետի իմաստով նվազ քանակով ընթացիկ գործեր ունեցող հաշտարարների կամ մշտապես գործող հաշտարարական հաստատությունների բացակայության դեպքում վիճակահանությունը կատարվում է պատահականության սկզբունքով՝ ծրագրում ներառված այն բոլոր հաշտարարների և մշտապես գործող հաշտարարական հաստատությունների ցանկից, որոնք սպասարկում են համապատասխան դիմումում կամ պահանջագրում նշված տարածքը և ներառված են այդպիսի գործեր քննող հաշտարարների կամ մշտապես գործող հաշտարարական հաստատությունների հատուկ ցանկում,

 3) եթե տվյալ դիմումով կամ պահանջագրով համապատասխանող տարածք որևէ հաշտարար կամ մշտապես գործող հաշտարարական հաստատությունների չի ընտրել (կամ որպես սպասարկման տարածք չի որոշվել Հայաստանի Հանրապետության ողջ տարածքը), ապա վիճակահանությունը կատարվում է պատահականության սկզբունքով՝ ծրագրում որպես տվյալ տարածքին հարող նշված տարածքը սպասարկող և տվյալ տեսակի գործեր քննող ցանկում ներառված հաշտարարների կամ մշտապես գործող հաշտարարական հաստատությունների հատուկ ցանկից` սույն կետի 1-ին և 2-րդ ենթակետերը հաշվի առնելով,

 4) սույն կետի 3-րդ ենթակետով սահմանված կարգով հաշտարար ընտրելու անհնարինության դեպքում վիճակահանությունը կատարվում է ծրագրում ներառված՝ տվյալ գործեր քննող հաշտարարների կամ մշտապես գործող հաշտարարական հաստատությունների հատուկ ցանկի բոլոր հաշտարարների ցանկից` սույն կետի 1-ին և 2-րդ ենթակետերի իմաստով նվազ քանակով ընթացիկ գործեր սպասարկող հաշտարարներից կամ մշտապես գործող հաշտարարական հաստատություններից:

(7-րդ կետը խմբ. 30.06.25 N 398-Ն, 29.12.25 N 882-Ն)

8. Վիճակահանությունն իրականացվում է ռեեստրում առանձնացված Ընդհանուր ցանկում ընդգրկված հաշտարարների թվից, բացառությամբ սույն կարգի 9-րդ կետով նախատեսված գործերով հաշտարարություն իրականացնելու նպատակով դիմում կամ պահանջագիր ներկայացվելու դեպքում:

 (8-րդ կետը փոփ. 29.12.25 N 882-Ն)

9. Օրենքի 17-րդ հոդվածի 4-րդ մասին համապատասխան՝ ամուսնալուծության, երեխայի բնակության վայրի որոշման կամ դրա փոփոխման, այդ թվում՝ դատարանի սահմանած բնակության վայրը փոփոխելու, ալիմենտի (ապրուստավճարի) բռնագանձման կամ դրա փոփոխման, այդ թվում՝ դատարանի սահմանած ալիմենտի չափը փոփոխելու, ամուսինների ընդհանուր սեփականությունը համարվող գույքի բաժանման, երեխայի հետ շփմանը, դաստիարակությանն ու կրթությանը վերաբերող հարցերով ծնողական իրավունքների իրականացման, երեխայի տեսակցության կարգ սահմանելու կամ դրանց փոփոխման, այդ թվում՝ դատարանի սահմանած, ամուսնական պայմանագրի փոփոխման կամ լուծման վերաբերյալ գործերով հաշտարարություն իրականացնելու նպատակով դիմում կամ պահանջագիր ներկայացվելու դեպքում վիճակահանությունն իրականացվում է ռեեստրում առանձնացված Պարտադիր հաշտարարության գործեր քննող հաշտարարների ցանկում ընդգրկված հաշտարարների թվից:

(9-րդ կետը լրաց., փոփ. 29.12.25 N 882-Ն) 

10. Ծրագրում իրականացվող վիճակահանությանը չեն մասնակցում Ընդհանուր ցանկում կամ Պարտադիր հաշտարարության գործեր քննող հաշտարարների ցանկում չընդգրկված կամ նշված ցանկերում մասնակցությունը կասեցրած կամ դադարեցրած կամ որակավորումը կասեցված կամ որակավորումը դադարեցված հաշտարարները: Այն դեպքերում, երբ վիճակահանությամբ ընտրված հաշտարարը չի նշանակվում դատարանի կողմից և միևնույն գործով Նախարարություն պահանջագիր է ներկայացվում կամ եթե հաշտարարը հրաժարվել է իրականացնել հաշտարարություն կամ փոխկապակցվածության հիմքերի կամ օրենքով սահմանված հիմքերի առկայությամբ պայմանավորված հաշտարարություն չի իրականացվել, ապա միևնույն գործով հաշտարար նշանակելու վերաբերյալ Նախարարություն դիմում կամ պահանջագիր ներկայացվելու դեպքում նախորդ վիճակահանությամբ ընտրված հաշտարարը վիճակահանությանը չի մասնակցում:

(10-րդ կետը փոփ. 29.12.25 N 882-Ն)

11. Սույն կարգի 8-րդ և 9-րդ կետերով նախատեսված Ընդհանուր ցանկում կամ Պարտադիր հաշտարարության գործեր քննող հաշտարարների ցանկում ընդգրկված հաշտարարների թիվը երեքից պակաս լինելու դեպքում (ներառյալ, երբ ցանկում ընդգրկված հաշտարարների թիվը ֆիզիկապես երեքից պակաս չէ, սակայն սույն կարգի 10-րդ կետին համապատասխան՝ վիճակահանությանը մասնակցող հաշտարարների թիվը պակաս է երեքից) ծրագիրը վիճակահանությունն իրականացնում է արտոնագրված բոլոր հաշտարարների տվյալները պարունակող ռեեստրում հաշվառված հաշտարարների թվից:

(11-րդ կետը փոփ. 29.12.25 N 882-Ն) 

12. Միևնույն անձանց միջև միևնույն դատական գործով դատարանի կողմից կրկին ներկայացված պահանջագրի հիման վրա վիճակահանությանը չի մասնակցում այն հաշտարարը, որի թեկնածությունը տվյալ գործով նախկինում ներկայացվել է դատարան և հաշտարարը «Հաշտարարության մասին» Հայաստանի Հանրապետության օրենքի 9.1-ին հոդվածով նախատեսված փոխկապակցվածության հիմքերի կամ 9.1-ին հոդվածի 1-ին մասով նախատեսված հանգամանքների առկայությամբ պայմանավորված չի իրականացրել հաշտարարություն:

IV. ՎԻՃԱԿԱՀԱՆՈՒԹՅԱՆ ԱՐԴՅՈՒՆՔՆԵՐԻ ԱՄՓՈՓՈՒՄԸ

13. Վիճակահանության անցկացումից հետո դրա արդյունքներն արտացոլվում են ծրագրում: Հաշտարարն կամ մշտապես գործող հաշտարարական հաստատությունը իր թեկնածության ընտրության մասին ծանուցվում է իր էլեկտրոնային փոստի հասցեի, ինչպես նաև ծրագրում ունեցած անձնական էջի միջոցով:

(13-րդ կետը լրաց. 29.12.25 N 882-Ն)

14. Սույն կարգի 13-րդ կետով սահմանված ծանուցումը ստանալու պահից երեք աշխատանքային օրվա ընթացքում հաշտարարը կամ մշտապես գործող հաշտարարական հաստատությունը կարող է ծրագրի միջոցով հայտնել իր համաձայնությունը տվյալ գործով հաշտարար նշանակվելու վերաբերյալ կամ հրաժարվել հաշտարարություն իրականացնելուց: Եթե հաշտարարը կամ մշտապես գործող հաշտարարական հաստատությունը սույն կետով նախատեսված ժամկետում հաշտարար նշանակվելու վերաբերյալ համաձայնություն չի հայտնում, սույն կետով սահմանված ժամկետի ավարտից հետո համարվում է, որ հաշտարարը կամ մշտապես գործող հաշտարարական հաստատությունը հրաժարվել է հաշտարարություն իրականացնելուց: Հաշտարարի կամ մշտապես գործող հաշտարարական հաստատության հրաժարվելու դեպքում ծրագիրն ինքնաշխատ եղանակով իրականացնում է նոր վիճակահանություն, որին չի մասնակցում այդ գործով հաշտարարություն իրականացնելուց հրաժարված հաշտարարը կամ մշտապես գործող հաշտարարական հաստատությունը:

(14-րդ կետը լրաց. 29.12.25 N 882-Ն)

15. Մեկ տարվա ընթացքում երեքից ավելի անգամ հաշտարարություն իրականացնելուց հրաժարվելու դեպքում հաշտարարի էլեկտրոնային փոստի հասցեին և ծրագրում ունեցած անձնական էջին, ինչպես նաև նախարարության աշխատակցին ուղարկվում է ծանուցում հաշտարարի կողմից մեկ տարվա ընթացքում հաշտարարություն իրականացնելուց չորրորդ անգամ հրաժարվելու և «Հաշտարարության մասին» օրենքի 5-րդ հոդվածի 2.1-ին մասով սահմանված պահանջի խախտման վերաբերյալ:

16. Հաշտարարի կամ մշտապես գործող հաշտարարական հաստատության կողմից սույն կարգի 14-րդ կետով սահմանված կարգով հաշտարարություն իրականացնելու վերաբերյալ համաձայնություն հայտնելու դեպքում ծրագրի միջոցով գեներացվում և արտաբերվում է վիճակահանության արդյունքների մասին արձանագրություն՝ յուրաքանչյուր պահանջագրի և դիմումի մասով առանձին: Դատարանի կողմից ներկայացված պահանջագրի հիման վրա իրականացված վիճակահանության դեպքում արձանագրությունը տվյալներ է պարունակում դատարանի կողմից ներկայացված պահանջագրի (դատարանի անվանում, գործի համար, դատավորի անուն, ազգանուն), պահանջագրի հերթական համարի, վիճակահանության ամսաթվի, վիճակահանությանը մասնակցած հաշտարարների կամ մշտապես գործող հաշտարարական հաստատությունների թվի, վիճակահանության արդյունքում ընտրված հաշտարարի կամ մշտապես գործող հաշտարարական հաստատության թեկնածուի (անուն, ազգանուն, որակավորման վկայագրի համար, հեռախոսահամար, էլեկտրոնային փոստի հասցե) կամ մշտապես գործող հաշտարարական հաստատության անվանում, հեռախոսահամար, էլեկտրոնային փոստի հասցե վերաբերյալ: Դիմումների հիման վրա իրականացված վիճակահանության դեպքում արձանագրությունը տվյալներ է պարունակում կողմերի, վիճակահանության ամսաթվի, վիճակահանությանը մասնակցած հաշտարարների կամ մշտապես գործող հաշտարարական հաստատությունների թվի, վիճակահանության արդյունքում ընտրված հաշտարարի կամ մշտապես գործող հաշտարարական հաստատության թեկնածուի (անուն, ազգանուն, որակավորման վկայագրի համար) կամ մշտապես գործող հաշտարարական հաստատության անվանում վերաբերյալ:

(16-րդ կետը լրաց. 29.12.25 N 882-Ն)

17. Դատարանի կողմից պահանջագրի ներկայացման հիման վրա վիճակահանության իրականացման դեպքում սույն կարգի 16-րդ կետով նախատեսված արձանագրությունը դատարան է ներկայացվում ծրագրի միջոցով՝ ինքնաշխատ եղանակով, իսկ էլեկտրոնային փաստաթղթաշրջանառության անհնարինության դեպքում` թղթային եղանակով:

18. Կողմի դիմումի հիման վրա վիճակահանության իրականացման դեպքում սույն կարգի 16-րդ կետով նախատեսված արձանագրությունը կողմին ուղարկվում է ծրագրի միջոցով՝ ինքնաշխատ եղանակով, կողմի տրամադրած էլեկտրոնային փոստի հասցեին, ինչպես նաև ծրագրում ունեցած անձնական էջին:

19. Վիճակահանության արդյունքները արխիվացվում են և պահպանվում են ծրագրում:

(հավելվածը խմբ. 30.06.25 N 398-Ն, լրաց., խմբ., փոփ. 29.12.25 N 882-Ն)

Հավելված N 2 Արդարադատության նախարարի 2023 թվականի հունիսի 22-ի N 333-Ն հրամանի

ԴԻՄՈՒՄ

/Հաշտարար կամ հաշտարարական հաստատություն նշանակելու վերաբերյալ/

Հայաստանի Հանրապետության արդարադատության նախարարությանը

Դիմումատու՝

Խնդրում ենք նշել՝ ֆիզիկական անձ, իրավաբանական անձ

Ֆիզիկական անձի դեպքում՝

Անուն_____________

Ազգանուն ________

Հայրանուն (առկայության դեպքում) ___________

Իրավաբանական անձի դեպքում՝

Լրիվ անվանում _______

Գտնվելու վայրի հասցե, ներառյալ՝ Երևան քաղաքի կամ մարզի մասին նշումով________

Պետական գրանցման համար ______________

Իրավաբանական անձի ներկայացուցչի անուն ազգանուն ______

Դիմումատուի ծանուցման հասցե ___________________

Դիմումատուի հեռախոսահամար ___________________

Դիմումատուի էլեկտրոնային փոստի հասցե (առկայության դեպքում) __________

Կապի այլ միջոցներ (առկայության դեպքում)_________________

Լիազորված անձի միջոցով դիմումը ներկայացնելու դեպքում՝

Անուն_____________

Ազգանուն ________

Հայրանուն (առկայության դեպքում) ___________

Վեճի մյուս կողմ՝

Ֆիզիկական անձի դեպքում՝

Անուն_____________

Ազգանուն ________

Հայրանուն (առկայության դեպքում) ___________

Իրավաբանական անձի դեպքում՝

Լրիվ անվանում _______

Գտնվելու վայրի հասցե, ներառյալ՝ Երևան քաղաքի կամ մարզի մասին նշումով________

Պետական գրանցման համար ______________

Իրավաբանական անձի ներկայացուցչի անուն ազգանուն ______

Վեճի մյուս կողմի ծանուցման հասցե ___________________

Վեճի մյուս կողմի հեռախոսահամար ___________________

Վեճի մյուս կողմի էլեկտրոնային փոստի հասցե (առկայության դեպքում) __________

Վեճի մյուս կողմի կապի այլ միջոցներ (առկայության դեպքում) _________________

Ներկայացնելով սույն դիմումը` խնդրում եմ հաշտարարի կամ մշտապես գործող հաշտարարական հաստատության թեկնածու առաջարկել _______________________________________________ (ընտրե՛լ նշված տարբերակներից որևէ մեկը կամ մի քանիսը՝ ամուսնալուծության, երեխայի բնակության վայրի որոշման կամ դրա փոփոխման, այդ թվում՝ դատարանի սահմանած բնակության վայրը փոփոխելու, ալիմենտի (ապրուստավճարի) բռնագանձման կամ դրա փոփոխման, այդ թվում՝ դատարանի սահմանած ալիմենտի չափը փոփոխելու, ամուսինների ընդհանուր սեփականությունը համարվող գույքի բաժանման, երեխայի հետ շփմանը, դաստիարակությանն ու կրթությանը վերաբերող հարցերով ծնողական իրավունքների իրականացման, երեխայի տեսակցության կարգ սահմանելու կամ դրանց փոփոխման, այդ թվում՝ դատարանի սահմանած, ամուսնական պայմանագրի փոփոխման կամ լուծման, այլ քաղաքացիաիրավական գործով) վեճի արտադատական կարգով լուծման նպատակով:

Ընտրությունը մշտապես գործող հաշտարարական հաստատություններից կատարելու մասին համաձայնություն _________________:

ՊԱՀԱՆՋԱԳԻՐ

/Հաշտարարի կամ մշտապես գործող հաշտարարական հաստատություն թեկնածու առաջարկելու վերաբերյալ/

Հայաստանի Հանրապետության արդարադատության նախարարությանը

Դատարան ____________

Դատարանի նստավայր _____________

Դատավորի անուն և ազգանուն ______________

Քաղաքացիական գործի համար _____________

Ֆիզիկական անձի դեպքում՝

Անուն _____________

Ազգանուն ________

Հայրանուն (առկայության դեպքում) ___________

ՀԾՀ _____________

Ծննդյան ամսաթիվ _____________

Էլ. հասցե (առկայության դեպքում) ___________

Հեռախոսահամար _____________

Մարզ ___________

Ծանուցման հասցե ___________

Իրավաբանական անձի դեպքում՝

Լրիվ անվանում _______

Գտնվելու վայրի հասցե, ներառյալ՝ Երևան քաղաքի կամ մարզի մասին նշումով________

Պետական գրանցման համար ______________

Իրավաբանական անձի ներկայացուցչի անուն ազգանուն ______

Դիմումատուի ծանուցման հասցե ___________________

Դիմումատուի հեռախոսահամար ___________________

Դիմումատուի էլեկտրոնային փոստի հասցե (առկայության դեպքում) __________

Կապի այլ միջոցներ (առկայության դեպքում)_________________

Ներկայացնելով սույն պահանջագիրը` խնդրում եմ հաշտարարի կամ մշտապես գործող հաշտարարական հաստատության թեկնածու առաջարկել _______________________________________________ (ընտրե՛լ նշված տարբերակներից որևէ մեկը կամ մի քանիսը՝ ամուսնալուծության, երեխայի բնակության վայրի որոշման կամ դրա փոփոխման, այդ թվում՝ դատարանի սահմանած բնակության վայրը փոփոխելու, ալիմենտի (ապրուստավճարի) բռնագանձման կամ դրա փոփոխման, այդ թվում՝ դատարանի սահմանած ալիմենտի չափը փոփոխելու, ամուսինների ընդհանուր սեփականությունը համարվող գույքի բաժանման, երեխայի հետ շփմանը, դաստիարակությանն ու կրթությանը վերաբերող հարցերով ծնողական իրավունքների իրականացման, երեխայի տեսակցության կարգ սահմանելու կամ դրանց փոփոխման, այդ թվում՝ դատարանի սահմանած, ամուսնական պայմանագրի փոփոխման կամ լուծման, այլ քաղաքացիաիրավական գործով) վեճի արտադատական կարգով լուծման նպատակով:

Ընտրությունը մշտապես գործող հաշտարարական հաստատություններից կատարելու մասին համաձայնություն _________________:

(հավելվածը խմբ. 29.12.25 N 882-Ն)

Հավելված N 3 Արդարադատության նախարարի 2023 թվականի հունիսի 22-ի N 333-Ն հրամանի

ՊԱՀԱՆՋԱԳԻՐ

/Հաշտարարի թեկնածու առաջարկելու վերաբերյալ/

Արդարադատության նախարարությանը

Դատարան ____________

Դատարանի նստավայր _____________

Դատավորի անուն և ազգանուն ______________

Քաղաքացիական գործի համար _____________

Ներկայացնելով սույն պահանջագիրը` խնդրում եմ հաշտարարի թեկնածու առաջարկել _____________________________________________ (ընտրե՛լ նշված տարբերակներից որևէ մեկը՝ ամուսնալուծության, երեխայի բնակության վայրի որոշման, ալիմենտի (ապրուստավճարի) բռնագանձման, ամուսինների ընդհանուր սեփականությունը համարվող գույքի բաժանման, երեխայի հետ շփմանը, դաստիարակությանն ու կրթությանը վերաբերող հարցերով ծնողական իրավունքների իրականացման, երեխայի տեսակցության կարգ սահմանելու, ամուսնական պայմանագրի փոփոխման կամ լուծման, այլ քաղաքացիաիրավական գործով) վեճի արտադատական կարգով լուծման նպատակով:

Պաշտոնական հրապարակման օրը՝ 22 հունիսի 2023 թվական: