ԲԱՐՁՐԱԳՈՒՅՆ ԴԱՏԱԿԱՆ ԽՈՐՀՈՒՐԴ
|
ԲԴԽ-38-Ն-8 2026 թ. |
Ո Ր Ո Շ ՈՒ Մ
ԲԱՐՁՐԱԳՈՒՅՆ ԴԱՏԱԿԱՆ ԽՈՐՀՐԴԻ 2024 ԹՎԱԿԱՆԻ ՓԵՏՐՎԱՐԻ 1-Ի ԹԻՎ ԲԴԽ-8-Ն-4 ՈՐՈՇՄԱՆ ՄԵՋ ԼՐԱՑՈՒՄՆԵՐ ԵՎ ՓՈՓՈԽՈՒԹՅՈՒՆՆԵՐ ԿԱՏԱՐԵԼՈՒ ՄԱՍԻՆ
Ղեկավարվելով «Հայաստանի Հանրապետության դատական օրենսգիրք» սահմանադրական օրենքի 94-րդ հոդվածի 1-ին մասով, «Նորմատիվ իրավական ակտերի մասին» օրենքի 33-րդ և 34-րդ հոդվածներով՝ Բարձրագույն դատական խորհուրդը
ՈՐՈՇՈՒՄ Է
1. Բարձրագույն դատական խորհրդի 2024 թվականի փետրվարի 1-ի «Դատարաններում էլեկտրոնային համակարգի վարման և դրանից օգտվելու, ծավալուն էլեկտրոնային ֆայլերի, ինչպես նաև էլեկտրոնային համակարգի միջոցով ներկայացնելու անհնարինությամբ պայմանավորված էլեկտրոնային ֆայլերի ներկայացման կարգը սահմանելու մասին» թիվ ԲԴԽ-8-Ն-4 որոշման (այսուհետ՝ Որոշում) մեջ կատարել հետևյալ լրացումները և փոփոխությունները.
1) Որոշման նախաբանում «Հայաստանի Հանրապետության քաղաքացիական դատավարության օրենսգրքի 11.1.-ին գլխի և Հայաստանի Հանրապետության վարչական դատավարության օրենսգրքի 11.1.-ին գլխի» բառերը փոխարինել «Հայաստանի Հանրապետության քաղաքացիական դատավարության օրենսգրքի 11.1.-ին գլխի, Հայաստանի Հանրապետության վարչական դատավարության օրենսգրքի 11.1.-ին գլխի և «Սնանկության մասին» օրենքի 10.1.-ին գլխի» բառերով,
2) Որոշմամբ սահմանված հավելվածի 4-րդ կետի 2-րդ ենթակետի «ա» պարբերությունում «գործողություն» բառից հետո լրացնել «կամ սնանկության վարույթի շրջանակներում սնանկության գործով կառավարչին ուղղված դիմումի հիման վրա գրանցվել է էլեկտրոնային համակարգում» բառերը,
3) Որոշմամբ սահմանված հավելվածի 7-րդ կետում «միջոցով» բառից առաջ լրացնել «, իսկ սնանկության վարույթի դեպքում՝ https://e-bankruptcy.am/ կայքի» բառերը,
4) Որոշմամբ սահմանված հավելվածի 13.1-ին և 14-րդ կետերում համապատասխանաբար «Վարչական դատավարության» և «վարչական դատավարության» բառերից հետո լրացնել «և սնանկության վարույթի» բառերը,
5) Որոշմամբ սահմանված հավելվածը լրացնել նոր 19.2-րդ կետով՝ հետևյալ բովանդակությամբ․
«19.2. Սնանկության վարույթի դեպքում Համակարգի օգտատերը Համակարգում էլեկտրոնային դիմումը ստեղծում է անձնական գրասենյակ մուտք գործելու միջոցով։ Սեղմելով «Նոր դիմում» կոճակը՝ Համակարգի օգտատերը լրացնում է դիմումի ստեղծման համար պահանջվող դաշտերը՝ «Պարտատեր/եր և նրա ներկայացուցիչ/ներ», «Պարտապան/ներ և նրա ներկայացուցիչ/ներ», «Երրորդ անձ», «Դիմում», «Պահանջներ», «Միջնորդություններ», «Փաստաթղթեր», «Պետական տուրք»։»,
6) Որոշմամբ սահմանված հավելվածը լրացնել նոր 20.2-րդ կետով՝ հետևյալ բովանդակությամբ.
«20.2. Սույն որոշման 19.2-րդ կետում նշված գործողություններն իրականացնելուց հետո ստեղծվում է դիմումի սևագիր տարբերակը և համապատասխանաբար դատական գործը։ Ստեղծված դիմումը և դատական գործը հայտնվում են օգտատիրոջ անձնական գրասենյակի գործերի ցանկում՝ «Սևագիր» կարգավիճակով։ Դիմումի ավարտական տարբերակը ստեղծվում է «Ստորագրել» կոճակը սեղմելուց և դիմումը ստորագրելուց հետո։»,
7) Որոշմամբ սահմանված հավելվածի 24-րդ կետը շարադրել նոր խմբագրությամբ՝ հետևյալ բովանդակությամբ.
«24. Ֆիզիկական անձը դատական գործով որպես պատասխանող, երրորդ անձ, պարտապան կամ պարտատեր ներգրավված լինելու մասին փոստով ծանուցվելու դեպքում կարող է մուտք գործել Համակարգ և հասանելիություն ունենալ իրեն վերաբերվող դատական գործին՝ քաղաքացիական դատավարության դեպքում՝ https://cabinet.armlex.am/ կայք, վարչական դատավարության դեպքում՝ https://e-administrativecourt.am կայք, իսկ սնանկության վարույթի դեպքում՝ https://e-bankruptcy.am/ կայք մուտք գործելու և «ԵՍ ԵՄ» ազգային նույնականացման հարթակի միջոցով նույնականացվելու եղանակով։»։
2. Սույն որոշումն ուժի մեջ է մտնում ««Սնանկության մասին» օրենքում փոփոխություններ և լրացումներ կատարելու մասին» 2024 թվականի հունվարի 16-ի ՀՕ-27-Ն օրենքի 32-րդ հոդվածով նախատեսված կարգավորումներն ուժի մեջ մտնելու օրվանից, բայց ոչ շուտ, քան պաշտոնական հրապարակմանը հաջորդող օրվանից:
|
Բարձրագույն դատական խորհրդի նախագահ |
Ա. ԱԹԱԲԵԿՅԱՆ |
|
|
Պաշտոնական հրապարակման օրը՝ 28 ապրիլի 2026 թվական:
| Փոփոխող ակտ | Համապատասխան ինկորպորացիան |
|---|
| Փոփոխող ակտ | Համապատասխան ինկորպորացիան |
|---|