ՀՀ ԿԱՌԱՎԱՐՈՒԹՅԱՆ ՈՐՈՇՈՒՄԸ ՀՀ ԿԱՌԱՎԱՐՈՒԹՅԱՆ 2024 ԹՎԱԿԱՆԻ ՀՈՒՆԻՍԻ 6-Ի N 852-Ն ՈՐՈՇՈՒՄՆ ՈՒԺԸ ԿՈՐՑՐԱԾ ՃԱՆԱՉԵԼՈՒ ԵՎ ՀՀ ՍՅՈՒՆԻՔԻ ՄԱՐԶԻ ԿԱՊԱՆ ՀԱՄԱՅՆՔԻ ԿԱՊԱՆ ՔԱՂԱՔՈՒՄ ԳՏՆՎՈՂ ՀՈՂԱՄԱՍԻ ՆԿԱՏՄԱՄԲ ՀԱՆՐՈՒԹՅԱՆ ԳԵՐԱԿԱ ՇԱՀ ՃԱՆԱՉԵԼՈՒ ՄԱՍԻՆ

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

Ո Ր Ո Շ ՈՒ Մ

3 սեպտեմբերի 2026 թվականի N 1317-Ն

Ղեկավարվելով ««Հանրության գերակա շահերի ապահովման նպատակով սեփականության օտարման մասին» օրենքում փոփոխություններ և լրացումներ կատարելու մասին» 2026 թվականի փետրվարի 11-ի ՀՕ-28-Ն օրենքի 15-րդ հոդվածի 2-րդ մասով, «Հանրության գերակա շահերի ապահովման նպատակով սեփականության օտարման մասին» օրենքի 4-րդ հոդվածի 2-րդ մասի «ե» կետով և 7-րդ հոդվածով՝ Հայաստանի Հանրապետության կառավարությունը որոշում է.

1. Ուժը կորցրած ճանաչել Հայաստանի Հանրապետության կառավարության 2024 թվականի հունիսի 6-ի «Հայաստանի Հանրապետության Սյունիքի մարզի Կապան համայնքի Կապան քաղաքում գտնվող որոշ տարածքների նկատմամբ հանրության գերակա շահ ճանաչելու մասին» N 852-Ն որոշումը:

2. Հայաստանի Հանրապետության Սյունիքի մարզի Կապան համայնքի Կապան քաղաքում գտնվող՝ N 1 հավելվածում նշված հողամասի (այսուհետ՝ գույք) նկատմամբ ճանաչել հանրության գերակա շահ հետևյալ հիմնավորումներով՝

1) գույքի նկատմամբ հանրության գերակա շահ ճանաչելը պայմանավորված է ռազմավարական նշանակություն ունեցող Սյունիքի մարզկենտրոնում արդիական և միջազգային մրցումային չափանիշներին համապատասխանող ֆուտբոլային մարզադաշտ և ժամանակակից ֆուտբոլային ենթակառուցվածքներ կառուցելու անհրաժեշտությամբ.

2) օտարման նպատակի իրագործմամբ կստեղծվեն մանկապատանեկան, սիրողական և պրոֆեսիոնալ ֆուտբոլի զարգացման, միջազգային ու հանրապետական մարզական միջոցառումների անցկացման, բնակչության ֆիզիկական ակտիվության բարձրացման և առողջ ապրելակերպի խթանման նախադրյալներ.

3) գույքի նկատմամբ հանրության գերակա շահ ճանաչելը կնպաստի Սյունիքի մարզի մարզական կյանքի ակտիվացմանը, նոր ներդրումների ներգրավմանը, աշխատատեղերի ստեղծմանը, ինչպես նաև մարզի սոցիալ-տնտեսական և զբոսաշրջային ներուժի ու գրավչության բարձրացմանը։

3. Օտարման հիմք դիտարկվող հանրային շահը գերակայում է գույքի սեփականատիրոջ շահերին, քանի որ՝

1) կապահովի միջազգային և հանրապետական մարզական միջոցառումների անցկացումը՝ խթանելով Սյունիքի մարզում և Հայաստանի Հանրապետությունում սոցիալական, առողջապահական և տնտեսական զարգացումը.

2) կնպաստի Սյունիքի մարզի ճանաչելիության բարձրացմանը, այցելությունների և զբոսաշրջային հոսքերի ավելացմանը, ծառայությունների ոլորտի զարգացմանը և նոր աշխատատեղերի ստեղծմանը, լրացուցիչ տնտեսական ակտիվության ձևավորմանը ու նոր ներդրումների ներգրավվմանը.

3) կստեղծի մարզական մշակույթի զարգացման, բնակչության շրջանում ֆիզիկական ակտիվության և առողջ ապրելակերպի տարածման, ինչպես նաև բարեկարգ, անվտանգ և ժամանակակից մարզական միջավայրի ձևավորման նախադրյալներ:

4. Հանրության գերակա շահի արդյունավետ իրականացումը չի կարող ապահովվել առանց գույքի օտարման, քանի որ միջազգային չափանիշները բավարարող սպորտային համալիր կառուցելու համար անհրաժեշտ տեղադիրքով և քաղաքաշինական պայմաններով ազատ ու չծանրաբեռնված հողամասեր Կապան քաղաքում առկա չեն:

5. Գույքն օգտագործվելու է բացառապես հանրության գերակա շահ ճանաչված օտարման նպատակով և ուղղակիորեն նպաստելու է օտարման նպատակի իրագործմանը, քանի որ ֆուտբոլային մարզադաշտի և ժամանակակից ֆուտբոլային ենթակառուցվածքների շինարարական աշխատանքներն իրականացվելու են գույքի սահմաններում։

6. Գույքի նկատմամբ ճանաչված հանրության գերակա շահը չհիմնավորված վնաս չի պատճառում օտարվող սեփականության սեփականատիրոջը և ողջամտորեն իրագործելի է սահմանված վերջնաժամկետում:

7. Սահմանել, որ՝

1) օտարվող սեփականության ձեռք բերողը Հայաստանի Հանրապետությունն է՝ ի դեմս Հայաստանի Հանրապետության կրթության, գիտության, մշակույթի և սպորտի նախարարության.

2) սեփականության օտարման գործընթացի մեկնարկի վերջնաժամկետը 2027 թվականի մարտի 1-ն է.

3) սեփականության օտարման գործառույթների իրականացումը համակարգող և պատասխանատու պետական լիազոր մարմինը Հայաստանի Հանրապետության կրթության, գիտության, մշակույթի և սպորտի նախարարությունն է.

4) օտարման նպատակի իրագործման մեկնարկի վերջնաժամկետը 2030 թվականի մարտի 1-ն է, իսկ ավարտի վերջնաժամկետը՝ 2030 թվականի դեկտեմբերի 31-ը:

8. Սույն որոշումն ուժի մեջ է մտնում պաշտոնական հրապարակմանը հաջորդող օրվանից։

Հայաստանի Հանրապետության վարչապետ	Ն. Փաշինյան
Երևան

03.09.2026 ՀԱՎԱՍՏՎԱԾ Է ԷԼԵԿՏՐՈՆԱՅԻՆ ՍՏՈՐԱԳՐՈՒԹՅԱՄԲ

Հավելված N 1 ՀՀ կառավարության 2026 թվականի սեպտեմբերի 3-ի N 1317-Ն որոշման

ՍԽԵՄԱ

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՍՅՈՒՆԻՔԻ ՄԱՐԶԻ ԿԱՊԱՆ ՀԱՄԱՅՆՔԻ ԿԱՊԱՆ ՔԱՂԱՔՈՒՄ ԳՏՆՎՈՂ ԵՎ ՀԱՆՐՈՒԹՅԱՆ ԳԵՐԱԿԱ ՇԱՀ ՃԱՆԱՉՎՈՂ ՀՈՂԱՄԱՍԻ

Հայաստանի Հանրապետության վարչապետի աշխատակազմի ղեկավար

Լ. Մակունց

03.09.2026 ՀԱՎԱՍՏՎԱԾ Է ԷԼԵԿՏՐՈՆԱՅԻՆ ՍՏՈՐԱԳՐՈՒԹՅԱՄԲ

Պաշտոնական հրապարակման օրը՝ 4 սեպտեմբերի 2026 թվական: