«Վավերացնում եմ»
Հայաստանի Հանրապետության
Նախագահ Ռ. Քոչարյան
13 հունվարի 2004 թ.

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

Ո Ր Ո Շ ՈՒ Մ

24 դեկտեմբերի 2003 թվականի N 1780-Ն

ՊՐՈԹԵԶԱՕՐԹՈՊԵԴԻԿ ՊԱՐԱԳԱՆԵՐԻ, ՎԵՐԱԿԱՆԳՆՄԱՆ ՏԵԽՆԻԿԱԿԱՆ ԿԱՄ ԱՅԼ ՄԻՋՈՑՆԵՐԻ ՏՐԱՄԱԴՐՄԱՆ ԿԱՐԳԸ ՀԱՍՏԱՏԵԼՈՒ ՄԱՍԻՆ

«Հայաստանի Հանրապետությունում հաշմանդամների սոցիալական պաշտպանության մասին» Հայաստանի Հանրապետության օրենքի 29-րդ և 31-րդ հոդվածներին համապատասխան` Հայաստանի Հանրապետության կառավարությունը որոշում է.

1. Հաստատել պրոթեզաօրթոպեդիկ պարագաների, վերականգնման տեխնիկական կամ այլ միջոցների տրամադրման կարգը` համաձայն հավելվածի:

2. Սույն որոշումն ուժի մեջ է մտնում պաշտոնական հրապարակմանը հաջորդող օրվանից:

Հայաստանի Հանրապետության վարչապետ	Ա. Մարգարյան
2004 թ. հունվարի 9 Երևան

Հավելված ՀՀ կառավարության 2003 թվականի դեկտեմբերի 24-ի N 1780-Ն որոշման

 Կ Ա Ր Գ

ՊՐՈԹԵԶԱՕՐԹՈՊԵԴԻԿ ՊԱՐԱԳԱՆԵՐԻ, ՎԵՐԱԿԱՆԳՆՄԱՆ ՏԵԽՆԻԿԱԿԱՆ ԿԱՄ ԱՅԼ ՄԻՋՈՑՆԵՐԻ ՏՐԱՄԱԴՐՄԱՆ

I. ԸՆԴՀԱՆՈՒՐ ԴՐՈՒՅԹՆԵՐ

1. Սույն կարգով սահմանվում է պրոթեզաօրթոպեդիկ պարագաների, վերականգնման տեխնիկական կամ այլ միջոցների անվճար տրամադրման կարգը:

2. Հաշմանդամներին, ինչպես նաև սույն կարգի 9, 10, 14 և 15-րդ կետերում նշված անձանց պրոթեզաօրթոպեդիկ պարագաները, վերականգնման տեխնիկական և այլ օժանդակ միջոցները տրամադրվում են անվճար` Հայաստանի Հանրապետության պետական բյուջեի և Հայաստանի Հանրապետության օրենսդրությամբ չարգելված այլ միջոցների հաշվին:

Պրոթեզաօրթոպեդիկ պարագաները, վերականգնման տեխնիկական և այլ օժանդակ միջոցները, բացառությամբ սայլակների և լսողական սարքերի, տրամադրում է պրոթեզաօրթոպեդիկ պարագաներ, վերականգնման տեխնիկական և այլ օժանդակ միջոցներ արտադրող կազմակերպությունը (այսուհետ` կազմակերպություն):

Սայլակները և լսողական սարքերը տրամադրում է Հայաստանի Հանրապետության սոցիալական ապահովության նախարարությունը:

II. ՊՐՈԹԵԶՆԵՐԻ ԵՎ ՕՐԹԵԶՆԵՐԻ ՏՐԱՄԱԴՐՈՒՄԸ

3. Հաշմանդամներին պրոթեզաօրթոպեդիկ պարագաներ տրամադրվում են հաշմանդամի անհատական վերականգնողական ծրագրին համապատասխան, կազմակերպության բժշկի (պրոթեզավորող մասնագետի) (այսուհետ` մասնագետ) գրավոր եզրակացության հիման վրա (բացառությամբ սույն կարգի 5-րդ կետում նշված դեպքերի) և սույն կարգի 26-րդ կետում նշված պրոթեզաօրթոպեդիկ պարագաների օգտագործման ժամկետներով:

4. Հաշմանդամներին տրամադրված պրոթեզաօրթոպեդիկ պարագաների վերականգնումն իրականացնում է դրանք տրամադրող կազմակերպությունը` Հայաստանի Հանրապետության պետական բյուջեի միջոցների հաշվին:

5. Հաշմանդամների վերին և ստորին վերջույթների առաջին անգամ պրոթեզավորումը և օրթեզավորումը կատարվում է Հայաստանի Հանրապետության սոցիալական ապահովության նախարարի կողմից ստեղծված բուժատեխնիկական հանձնաժողովի (այսուհետ` հանձնաժողով) գրավոր եզրակացության հիման վրա:

Հանձնաժողովը եզրակացություն է տալիս նաև հաշմանդամներին սահմանված ժամկետից շուտ պրոթեզաօրթոպեդիկ պարագաներով ապահովման և պրոթեզավորման անհրաժեշտության դեպքերում:

6. Առաջին անգամ անդամահատված անձի համար, մասնագետի եզրակացության հիման վրա և մինչև հիմնական պրոթեզի պատրաստումը, պատրաստվում ու տրամադրվում է բուժամարզական պրոթեզ:

7. Վերին վերջույթի պրոթեզի կարիք ունեցող հաշմանդամները, 4 տարի ժամանակով, ստանում են կոսմետիկ պրոթեզ և շարժողական պրոթեզ (ձգողական կամ բիոպրոթեզ):

8. Վերին և ստորին վերջույթների կարիք ունեցողներին, անկախ նոր պրոթեզ տրամադրելու ժամկետից, յուրաքանչյուր տարի անվճար տրվում է ծայրատի վրայի երկուական ձեռնոց կամ գուլպա:

9. Հաշմանդամներին, ինչպես նաև սոցիալապես անապահով կանանց (որոնց ընտանիքներն ընդգրկված են աղքատության ընտանեկան նպաստի համակարգում), սոցիալական ծառայություններ տրամադրող տարածքային մարմնի տրված տեղեկանքի և մասնագետի եզրակացության հիման վրա, անվճար տրվում է կրծքագեղձի պրոթեզ, ինչպես նաև կրծկալ-ամրակներ` յուրաքանչյուր տարի մեկ հատ:

10. Հաշմանդամներին և մինչև 18 տարեկան երեխաներին, մասնագետի եզրակացության հիման վրա, տրամադրվում են աղեկապեր կամ սեղմիրաններ, կամ ռեկլինատորներ, կամ ծնկակալներ, կամ տուտորներ, կամ սուպինատորներ կամ այլ օրթոպեդիկ պարագաներ:

III. ՕՐԹՈՊԵԴԻԿ ԿՈՇԻԿՆԵՐԻ ԵՎ ՊՐՈԹԵԶԻ ԿՈՇԻԿՆԵՐԻ ՏՐԱՄԱԴՐՈՒՄԸ

11. Հաշմանդամներին օրթոպեդիկ կոշիկները (բարդ ու ոչ բարդ) և պրոթեզի կոշիկները տրամադրվում են յուրաքանչյուր տարի երկու զույգ` մեկ զույգ` տաքացված տակդիրներով և մեկ զույգ` առանց տաքացված տակդիրների:

12. Վերին երկու վերջույթների ծայրատներով, ինչպես նաև մեկ ձեռքի ծայրատով և մյուս ձեռքի դաստակի դեֆորմացիայով հաշմանդամներին անվճար տրվում է կոշիկ` կողային ռետինե ժապավեններով:

IV. ՎԵՐԱԿԱՆԳՆՄԱՆ ՏԵԽՆԻԿԱԿԱՆ ԵՎ ԱՅԼ ՕԺԱՆԴԱԿ ՄԻՋՈՑՆԵՐԻ ՏՐԱՄԱԴՐՈՒՄԸ

13. Առաջին խմբի հաշմանդամներին և մինչև 18 տարեկան հաշմանդամ երեխաներին, Հայաստանի Հանրապետության բժշկասոցիալական փորձաքննության գործակալության տարածքային մարմնի եզրակացության հիման վրա, տրամադրվում են սայլակներ (հեծանվասայլակ, թիկնասայլակ, նստասայլակ, զբոսասայլակ, փոքր տրամաչափի սայլակ) և քայլակներ:

Ստորին վերջույթների ազդրային հատվածների երկկողմանի անդամահատումից հետո սայլակներ ստացած հաշմանդամներին կարող է տրամադրվել նաև փոքր տրամաչափի սայլակ:

14. Հաշմանդամներին, տարիքային կենսաթոշակառուներին և մինչև 18 տարեկան երեխաներին լսողական սարք հատկացվում է աուդիոմետրիկ հետազոտություններ իրականացնող բժշկական հաստատության եզրակացության հիման վրա:

15. Հենակներ և ձեռնափայտեր, մասնագետի եզրակացության հիման վրա, տրամադրվում են հաշմանդամներին, ինչպես նաև`

ա) Հայրենական մեծ պատերազմի մասնակիցներին և նրանց հավասարեցված անձանց,

բ) Հայրենական մեծ պատերազմում զոհվածների այրիներին,

գ) Հայաստանի Հանրապետության պաշտպանության ժամանակ զոհված զինծառայողների ընտանիքների անդամներին,

դ) մինչև 18 տարեկան երեխաներին:

V. ՊՐՈԹԵԶԱՕՐԹՈՊԵԴԻԿ ՊԱՐԱԳԱՆԵՐԻ, ՎԵՐԱԿԱՆԳՆՄԱՆ ՏԵԽՆԻԿԱԿԱՆ ԵՎ ԱՅԼ ՕԺԱՆԴԱԿ ՄԻՋՈՑՆԵՐԻ ՏՐԱՄԱԴՐՄԱՆ ՁԵՎԱԿԵՐՊՈՒՄԸ

16. Անձը պրոթեզաօրթոպեդիկ պարագաներ, վերականգնման տեխնիկական և այլ օժանդակ միջոցներ, բացառությամբ հաշմանդամի սայլակների և լսողական սարքերի, ստանալու համար դիմում է կազմակերպություն, իսկ առաջին անգամ անդամահատված անձը` հանձնաժողով` ներկայացնելով դիմում, անձը հաստատող փաստաթուղթ (մինչև 16 տարեկան երեխաների համար` ծննդյան վկայական), հաշմանդամությունը հավաստող փաստաթուղթ, քաղվածք հիվանդության պատմությունից (էպիկրիզ), իսկ երեխաների համար` նաև ծնողներից մեկի կամ օրինական ներկայացուցչի անձնագիրը կամ անձը հաստատող փաստաթուղթը:

17. Պրոթեզաօրթոպեդիկ պարագաներ, վերականգնման տեխնիկական և այլ օժանդակ միջոցներ ստացող հաշմանդամների համար կազմակերպությունում լրացվում է անձնական քարտ, որտեղ նշվում են ստացողի ազգանունը, անունը, բնակության վայրը, ծննդյան տարեթիվը, հիվանդության ախտորոշումը, պրոթեզաօրթոպեդիկ պարագաների, վերականգնման տեխնիկական և այլ օժանդակ միջոցների անվանումները, արժեքը, տրամադրման ժամկետը, անվճար տրամադրման իրավական հիմքը:

18. Կազմակերպությունից պրոթեզաօրթոպեդիկ պարագաները, վերականգնման տեխնիկական և այլ օժանդակ միջոցներն ստանալիս անձը ստորագրում է իր անձնական քարտում:

19. Անձնական քարտը խիստ հաշվառման փաստաթուղթ է և պահպանվում է Հայաստանի Հանրապետության օրենսդրությամբ սահմանված կարգով:

20. Պրոթեզաօրթոպեդիկ պարագաները հաշմանդամին տրամադրվում են անհատական հարմարեցումից և հաշմանդամին օգտագործման ձևը սովորեցնելուց հետո:

21. Կազմակերպությունը պարտավոր է անձի խնդրանքով նրան տրամադրել քաղվածք անձնական քարտից:

22. Անձը սայլակ և լսողական սարք ստանալու համար դիմում է սոցիալական ծառայություններ տրամադրող տարածքային մարմին` ներկայացնելով հետևյալ փաստաթղթերը` դիմում, անձը հաստատող փաստաթուղթ (մինչև 16 տարեկան երեխաների համար` ծննդյան վկայական), հաշմանդամությունը հավաստող փաստաթուղթ, իսկ երեխաների համար` նաև ծնողներից մեկի կամ օրինական ներկայացուցչի անձը հաստատող փաստաթուղթը: Անձը սայլակ ստանալու համար ներկայացնում է նաև Հայաստանի Հանրապետության բժշկասոցիալական փորձաքննության գործակալության տարածքային մարմնի եզրակացությունը, իսկ լսողական սարք ստանալու համար` աուդիոմետրիկ հետազոտություններ իրականացնող բժշկական հաստատության եզրակացությունը:

23. Սոցիալական ծառայություններ տրամադրող տարածքային մարմինը դիմումներն ու դրանց կցված փաստաթղթերը հաշվառում է համապատասխան մատյանում և մինչև յուրաքանչյուր ամսվան հաջորդող ամսվա 10-ը դրանք ուղարկում Հայաստանի Հանրապետության սոցիալական ապահովության նախարարություն:

24. Հայաստանի Հանրապետության սոցիալական ապահովության նախարարությունը հաշվառում է ստացված դիմումներն ու փաստաթղթերը` դրանց ներկայացման ամսաթվերով:

25. Սայլակները և լսողական սարքերը դրանց կարիքն ունեցող անձանց տրամադրում է Հայաստանի Հանրապետության սոցիալական ապահովության նախարարի կողմից ստեղծված հանձնաժողովը:

VI. ՊՐՈԹԵԶԱՕՐԹՈՊԵԴԻԿ ՊԱՐԱԳԱՆԵՐԻ, ՎԵՐԱԿԱՆԳՆՄԱՆ ՏԵԽՆԻԿԱԿԱՆ ԿԱՄ ԱՅԼ ՄԻՋՈՑՆԵՐԻ ՕԳՏԱԳՈՐԾՄԱՆ ԺԱՄԿԵՏՆԵՐԸ

26. Պրոթեզաօրթոպեդիկ պարագաների, վերականգնման տեխնիկական և այլ միջոցների օգտագործման ժամկետներն են`

NN ը/կ	Անվանումը	Օգտագործման ժամկետը
1	2	3
1.	Պրոթեզներ
1.1.	Սրունքի պրոթեզ	երեք տարի
1.2.	Ազդրի պրոթեզ	երեք տարի
1.3.	Վերին վերջույթների պրոթեզ`	երեք տարի
	դաստակի պրոթեզ	չորս տարի
	նախաբազկի պրոթեզ	չորս տարի
1	2	3
1.4.	Ապարատներ`
	ԱՆ 8-01	երկու տարի
	ԱՆ 0-01	երկու տարի
	ԱՆ 0-03	երկու տարի
1.5	Տուտորներ`
	ՏՆ-0-02	վեց ամիս
	ՏՆ-8-02	մեկ տարի
	ՏՆ-0-02	վեց ամիս
	ՏՆ-4-02	վեց ամիս
1.6	Սեղմիրաններ	երկու տարի
1.7.	Աղեկապեր	մեկ տարի
2.	Սրունքի օրթոպրոթեզ	երեք տարի
3.	Կոշիկներ`
3.1.	պրոթեզի	մեկ տարի
3.2.	օրթոպեդիկ	մեկ տարի
4.	Վերականգնման տեխնիկական միջոցներ
4.1.	Ձեռնափայտեր	երկու տարի
4.2.	Հենակներ	երկու տարի
4.3.	Սուպինատորներ	մեկ տարի
4.4.	Կրծքագեղձի պրոթեզ	մեկ տարի
4.5.	Լսողական սարքեր	չորս տարի
4.6.	Հաշմանդամի սայլակ	չորս տարի
4.7.	Փոքր տրամաչափի սայլակ	երկու տարի

Հայաստանի Հանրապետության կառավարության աշխատակազմի ղեկավար-նախարար

Մ. Թոփուզյան