ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

Ո Ր Ո Շ ՈՒ Մ

18 սեպտեմբերի 2014 թվականի N 1111-Ն

ԱՐԱՐԱՏՅԱՆ, ՀՐԱԶԴԱՆԻ ԵՎ ԱԽՈՒՐՅԱՆԻ ԱՎԱԶԱՆԱՅԻՆ ԿԱՌԱՎԱՐՄԱՆ ՏԱՐԱԾՔՆԵՐՈՒՄ ՍԱԿԱՎԱՋՐՈՒԹՅԱՆ ԵՎ ԵՐԱՇՏԻ ՄԱՍԻՆ

Հիմք ընդունելով Հայաստանի Հանրապետության ջրային օրենսգրքի 92-րդ հոդվածը` Հայաստանի Հանրապետության կառավարությունը որոշում է.

1. Սահմանել Արարատյան, Հրազդանի և Ախուրյանի ավազանային կառավարման տարածքներում սակավաջրություն:

2. Հայաստանի Հանրապետության բնապահպանության նախարարին` սույն որոշման 1-ին կետով նախատեսված տարածքներում գոյություն ունեցող ջրօգտագործողների ջրօգտագործման թույլտվություններում կատարել ջրօգտագործման ծավալների և (կամ) ռեժիմների կրճատման սահմանափակումներ և չափավորումներ` Հայաստանի Հանրապետության ջրային օրենսգրքով, «Հայաստանի Հանրապետության ջրի ազգային ծրագրի մասին» և «Ջրի ազգային քաղաքականության հիմնադրույթների մասին» Հայաստանի Հանրապետության օրենքներով ամրագրված ջրային ռեսուրսների օգտագործման և պահպանության գերակայությունների դրույթների համաձայն:

3. Հայաստանի Հանրապետության գյուղատնտեսության նախարարին` ձեռնարկել անհրաժեշտ քայլեր Արարատյան դաշտի ջրօգտագործում իրականացնող ձկնաբուծական տնտեսություններում կիսափակ ջրամատակարարման համակարգի պիլոտային ծրագրերի ներդրման ուղղությամբ և արդյունքների վերաբերյալ յուրաքանչյուր եռամսյակին հաջորդող ամսվա մինչև 10-ը տեղեկատվություն ներկայացնել Հայաստանի Հանրապետության կառավարություն:

4. Հայաստանի Հանրապետության արտակարգ իրավիճակների նախարարին` Արարատյան, Հրազդանի և Ախուրյանի ավազանային կառավարման տարածքներում, օդերևութաբանական վերլուծության արդյունքում, երաշտի նախապայմանների վերաբերյալ տեղեկատվություն ներկայացնել Հայաստանի Հանրապետության կառավարություն:

5. Արարատյան, Հրազդանի և Ախուրյանի ավազանային կառավարման տարածքներում սահմանված սակավաջրությունը Հայաստանի Հանրապետության կառավարության կողմից կարող է վերացվել Հայաստանի Հանրապետության բնապահպանության նախարարի կողմից ներկայացված տեղեկատվության հիման վրա:

6. Սույն որոշումն ուժի մեջ է մտնում պաշտոնական հրապարակման օրվան հաջորդող տասներորդ օրը: