Պ Ա Շ Տ Ո Ն Ա Կ Ա Ն  Պ Ա Ր Զ Ա Բ Ա Ն ՈՒ Մ

2011 թվականի հունվարի 1-ից բենզինի Եվ (կամ) դիզելային վառելիքի արտադրանքի հարկման որոշ հարցերի վերաբերյալ

«Բենզինի և դիզելային վառելիքի համար հաստատագրված վճարների մասին» Հայաստանի Հանրապետության օրենքն ուժը կորցրած ճանաչելու մասին» Հայաստանի Հանրապետության օրենքի (7.10.2010թ, ՀՕ-130-Ն) համաձայն 2011 թվականի հունվարի 1-ից ուժը կորցրած է ճանաչվել «Բենզինի և դիզելային վառելիքի համար հաստատագրված վճարների մասին» Հայաստանի Հանրապետության օրենքը:

«Ակցիզային հարկի մասին» Հայաստանի Հանրապետության օրենքի 5-րդ հոդվածի 6-րդ մասի համաձայն` 2011 թվականի հունվարի 1-ից բենզինի 1 տոննայի համար սահմանված ակցիզային հարկի և օրենսդրությամբ սահմանված կարգով հաշվարկված ԱԱՀ-ի հանրագումարը 112000 ՀՀ դրամից պակաս լինելու դեպքում ակցիզային հարկն ավելացվում է այն չափով, որպեսզի բենզինի 1 տոննայի համար գանձվող ակցիզային հարկի և ԱԱՀ-ի հանրագումարը հավասարվի 112000 ՀՀ դրամի:

«Ավելացված արժեքի հարկի մասին» Հայաստանի Հանրապետության օրենքի 8-րդ հոդվածի 2-րդ կետի համաձայն Հայաստանի Հանրապետություն ներմուծվող ապրանքների համար ներմուծման պահին ԱԱՀ-ով հարկվող շրջանառություն է համարվում դրանց՝ օրենքով սահմանված կարգով որոշվող մաքսային արժեքի և գանձվող մաքսատուրքի ու ակցիզային հարկի գումարը:

Ելնելով վերոգրյալից և ղեկավարվելով «Իրավական ակտերի մասին» Հայաստանի Հանրապետության օրենքի 87-րդ հոդվածով պաշտոնապես պարզաբանում եմ.

1. Բենզինի 1 տոննայի համար սահմանված ակցիզային հարկի և օրենսդրությամբ սահմանված կարգով հաշվարկված ԱԱՀ-ի հանրագումարը 112000 Հայաստանի Հանրապետության դրամից պակաս լինելու դեպքում ավելացվող գումարը բաղկացած է երկու մասից` ակցիզային հարկի գումար և դրա նկատմամբ հաշվարկված ԱԱՀ-ի գումար:

Օրինակ.

Կազմակերպության ներմուծած բենզինի 1 տոննայի մաքսային արժեքը կազմել է 320000 դրամ: Ներմուծված բենզինի 1 տոննայի համար ակցիզային հարկի դրույքաչափը օրենքով սահմանված է 25000 դրամ: Հաշվարկվող ԱԱՀ-ի գումարը կկազմի 69000 դրամ [(320000+25000)x20%], իսկ ԱԱՀ-ի և ակցիզային հարկի հանրագումարը` 94000 դրամ (69000+25000): Քանի որ «Ակցիզային հարկի մասին» Հայաստանի Հանրապետության օրենքի 5-րդ հոդվածի 6-րդ մասի համաձայն ներմուծվող բենզինի համար ակցիզային հարկի և ԱԱՀ-ի հանրագումարը չպետք է պակաս լինի 112000 դրամից, կազմակերպության կողմից պետք է վճարվի նաև 18000 դրամ (112000-94000), որում ակցիզային հարկի մեծությունը կազմում է 15000 դրամ, իսկ ավելացված արժեքի հարկի մեծությունը` 3000 դրամ (վերջինս կարող է հաշվարկվել կամ ԱԱՀ-ի հաշվարկային դրույքաչափի (16.67%) կիրառմամբ (18000x16.67%), կամ որպես լրացուցիչ վճարվող գումարի 1/6 մաս): Տվյալ դեպքում ներմուծվող բենզինի 1 տոննայի համար կազմակերպությունը պետք է վճարի ակցիզային հարկ` 40000 դրամ, իսկ ԱԱՀ` 72000 դրամ:

2. Քանի որ «Ակցիզային հարկի մասին» Հայաստանի Հանրապետության օրենքում փոփոխություններ և լրացումներ կատարելու մասին» (7.10.2010թ. ՀՕ-126-Ն) և «Ավելացված արժեքի հարկի մասին» Հայաստանի Հանրապետության օրենքում լրացումներ կատարելու մասին» (7.10.2010թ. ՀՕ-129-Ն) Հայաստանի Հանրապետության օրենքներն ուժի մեջ են մտնում 2011 թվականի հունվարի 1-ից` բենզինի և (կամ) դիզելային վառելիքի արտադրանքի ավելացված արժեքի հարկով և ակցիզային հարկով հարկմանը վերաբերող օրենքների դրույթները կիրառվում են 2011 թվականի հունվարի 1-ից հետո Հայաստանի Հանրապետություն ներմուծվող և իրացվող բենզինի և(կամ) դիզելային վառելիքի արտադրանքների նկատմամբ:

3. 2011 թվականի հունվարի 1-ի դրությամբ ներմուծողների մոտ առկա բենզինի և(կամ) դիզելային վառելիքի ապրանքային մնացորդների իրացման գործարքների մասով հարկային պարտավորությունները հաշվարկվում են մինչև 2011 թվականի հունվարի 1-ը գործող օրենսդրությամբ սահմանված կարգով: Ապրանքային մնացորդների օտարման մասով ներմուծողները վճարում են շահութահարկին (եկամտահարկին) փոխարինող հաստատագրված վճար` «Բենզինի և դիզելային վառելիքի հաստատագրված վճարների մասին» Հայաստանի Հանրապետության օրենքի 4-րդ հոդվածի 2-րդ մասով սահմանված չափով, իսկ նրանց կողմից բենզինի և (կամ) դիզելային վառելիքի մանրածախ վաճառքի մասով` նաև հաստատագրված վճար` «Հաստատագրված վճարների մասին» Հայաստանի Հանրապետության օրենքով սահմանված չափով:

4. Հարկ վճարողների (այդ թվում` ներմուծողների) մոտ 2011 թվականի հունվարի 1-ի դրությամբ առկա բենզինի և(կամ) դիզելային վառելիքի ապրանքային մնացորդների իրացման գործարքների մասով հարկային հաշիվներ դուրս չեն գրվում:

5. 2011 թվականի հունվարի 1-ից հետո դիզելային վառելիքի ներմուծումը և իրացումը (այդ թվում` ներմուծող չհանդիսացող անձանց կողմից) ազատվում է ավելացված արժեքի հարկից: Դիզելային վառելիքի իրացման գործարքների մասով հարկային հաշիվներ դուրս չեն գրվում:

6. 2011 թվականի հունվարի 1-ից հետո բենզինի իրացումների դեպքում «Ավելացված արժեքի հարկի մասին» Հայաստանի Հանրապետության օրենքով սահմանված կարգով հարկային հաշիվներ դուրս են գրվում.

 1) բենզին ներմուծողների կողմից` 2011թ. հունվարի 1-ից հետո ներմուծված բենզինի օտարման` օրենքով ԱԱՀ-ի 20 (հաշվարկային` 16.67%) դրույքաչափով հարկվող գործարքների մասով, բացառությամբ` բենզինի և (կամ) դիզելային վառելիք մանրածախ առևտրի կետերի միջոցով (հաստատագրված վճարով հարկվող գործունեության մասով) իրացման գործարքների,

 2) բենզինի ներմուծող չհանդիսացող անձանց կողմից` հարկային հաշիվներով ձեռքբերված բենզինի օտարման այն գործարքների մասով, որոնք ենթակա են ԱԱՀ-ի 20 տոկոս (կամ հաշվարկային` 16.67%) դրույքաչափով հարկման:

 7. 2011 թվականի հունվարի 1-ից հետո հաշվետու ժամանակաշրջանում իրականացված գործարքների հարկվող շրջանառության նկատմամբ հաշվարկված ԱԱՀ-ի գումարներից հարկային հաշիվ չհանդիսացող հաշվարկային փաստաթղթերի հիման վրա «Բենզինի և դիզելային վառելիքի հաստատագրված վճարների մասին» Հայաստանի Հանրապետության օրենքի 6-րդ հոդվածի 3-րդ մասով սահմանված կարգով հաշվանցումներ (նվազեցումներ) չեն կատարվում (2011 թվականի հունվարի 1-ից հետո «Բենզինի և դիզելային վառելիքի հաստատագրված վճարների մասին» Հայաստանի Հանրապետության օրենքի 6-րդ հոդվածի 3-րդ մասով սահմանված դրույթը չի կիրառվում):

8. 2011 թվականի հունվարի 1-ից հետո բենզինի գծով ձեռքբերումների մասով ԱԱՀ վճարողները ավելացված արժեքի հարկի գումարների հաշվանցումներ կարող են կատարվել միայն հարկային հաշվի առկայության դեպքում:

9. 2011 թվականի հունվարի 1-ից հետո Հայաստանի Հանրապետություն բենզին և(կամ) դիզելային վառելիք ներկրող` ԱԱՀ վճարող համարվող հարկ վճարողները հաշվանցման իրավունք են ձեռքբերում ԱԱՀ-ով հարկվող գործարքների (այդ թվում` բենզինի իրացման ԱԱՀ-ով հարկվող գործարքների) մասով: