ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

Ո Ր Ո Շ ՈՒ Մ

8 նոյեմբերի 2007 թվականի N 1410-Ն

ՃԱՆԱՊԱՐՀԱՏՐԱՆՍՊՈՐՏԱՅԻՆ ՊԱՏԱՀԱՐՆԵՐԻ ՊԵՏԱԿԱՆ ՀԱՇՎԱՌՄԱՆ ԿԱՐԳԸ ՍԱՀՄԱՆԵԼՈՒ ՄԱՍԻՆ

Համաձայն «Ճանապարհային երթևեկության անվտանգության ապահովման մասին» Հայաստանի Հանրապետության օրենքի 8-րդ հոդվածի 2-րդ մասի` Հայաստանի Հանրապետության կառավարությունը որոշում է.

1. Սահմանել ճանապարհատրանսպորտային պատահարների պետական հաշվառման կարգը` համաձայն հավելվածի:

2. Ուժը կորցրած ճանաչել Հայաստանի Հանրապետության կառավարության 2002 թվականի օգոստոսի 1-ի «Ճանապարհային երթևեկության անվտանգության ապահովման ցուցանիշների պետական հաշվառման կարգը հաստատելու մասին» N 1297-Ն որոշումը:

3. Հայաստանի Հանրապետության ոստիկանության պետին` սույն որոշումն ուժի մեջ մտնելուց հետո մեկամսյա ժամկետում հաստատել սույն որոշմամբ սահմանված կարգի 7-րդ, 13-րդ և 15-րդ կետերով նախատեսված մատյանների և քարտի ձևերը:

4. Սույն որոշումն ուժի մեջ է մտնում 2008 թվականի հունվարի 1-ից:

Կ Ա Ր Գ

ՃԱՆԱՊԱՐՀԱՏՐԱՆՍՊՈՐՏԱՅԻՆ ՊԱՏԱՀԱՐՆԵՐԻ ՊԵՏԱԿԱՆ ՀԱՇՎԱՌՄԱՆ

1. Սույն կարգով սահմանվում է ճանապարհատրանսպորտային պատահարների պետական հաշվառումը:

2. Ճանապարհատրանսպորտային պատահարների պետական հաշվառումն իրականացվում է դրանց առաջացման պատճառների ու պայմանների ուսումնասիրման և վերացման, ինչպես նաև հետևանքների ծանրության աստիճանի նվազեցման ուղղությամբ միջոցներ ձեռնարկելու նպատակով:

3. Պետական հաշվառման ենթակա են բոլոր ճանապարհատրանսպորտային պատահարները:

4. Ճանապարհատրանսպորտային պատահարների պետական հաշվառումն իրականացվում է Հայաստանի Հանրապետության ոստիկանության «Ճանապարհային ոստիկանություն» ծառայության (այսուհետ` ճանապարհային ոստիկանություն) կողմից:

5. Ճանապարհային ոստիկանության ստորաբաժանումները (գումարտակներ, վաշտեր, դասակներ, ջոկեր) իրականացնում են իրենց կողմից սպասարկվող տարածքում տեղի ունեցած ճանապարհատրանսպորտային պատահարների տարածքային հաշվառումը` անկախ դրանց հետևանքներից:

6. Ճանապարհատրանսպորտային պատահարը համարվում է հաշվառված, եթե դրա վերաբերյալ տվյալները գրանցվել են ճանապարհատրանսպորտային պատահարների տարածքային հաշվառման մատյանում:

7. Ճանապարհատրանսպորտային պատահարների տարածքային հաշվառման մատյանը վարում է ճանապարհային ոստիկանության շարային ստորաբաժանման այն ծառայողը, ում այդ պարտականությունների կատարումը հանձնարարված է ճանապարհային ոստիկանության պետի հրամանով:

8. Եթե ճանապարհատրանսպորտային պատահարների հետևանքով զոհվել կամ վիրավորվել են մարդիկ, ապա պատահարի վայր ներկայանալուց հետո ճանապարհապարեկային ծառայության շարային ստորաբաժանման ծառայողն անհապաղ զեկուցում է ճանապարհային ոստիկանության օպերատիվ կառավարման կենտրոն և մանրամասն հաղորդում ներկայացնում` Հայաստանի Հանրապետության օրենսդրությամբ սահմանված կարգով միջոցներ ձեռնարկելուց հետո:

9. Հաղորդումը պետք է պարունակի հետևյալ տեղեկությունները`

1) պատահարի օրը, ամիսը, տարեթիվը, ժամը և վայրը.

2) պատահարին մասնակից տրանսպորտային միջոցների մակնիշները, հաշվառման համարանիշերը, պատկանելությունը.

3) վարորդների ազգանունները, անունները, հայրանունները, նրանց ծննդյան օրը, ամիսը, տարեթիվը, բնակության և աշխատանքի վայրերը.

4) պատահարի հետևանքով տուժածների ազգանունները, անունները, հայրանունները, նրանց ծննդյան օրը, ամիսը, տարեթիվը, բնակության և աշխատանքի վայրերը.

5) պատահարի վայր մեկնած օպերատիվ-քննչական խմբի կազմը.

6) պատահարը բնութագրող այլ հանգամանքներ` ճանապարհի վիճակը, եղանակային պայմանները և այլն:

10. Ճանապարհատրանսպորտային պատահարների տարածքային հաշվառում իրականացնող ծառայողն առնվազն յուրաքանչյուր եռամսյակը մեկ անգամ (Երևան քաղաքում` յուրաքանչյուր ամիսը մեկ անգամ) կատարում է ճանապարհատրանսպորտային պատահարների հետևանքով տուժած անձանց տվյալների համեմատություն բժշկական կազմակերպություններում գրանցված տվյալների հետ, արդյունքների մասին կազմում տեղեկանք և զեկուցում ստորաբաժանման ղեկավարին:

11. Եթե համեմատություն կատարելու ընթացքում հայտնաբերվել են դեպքեր, որոնք տեղի են ունեցել տվյալ ստորաբաժանման վարչական տարածքից դուրս, ապա դրա մասին ոչ ուշ, քան մեկ օրվա ընթացքում տեղեկացվում է համապատասխան վարչական տարածքի ստորաբաժանմանը:

12. Համեմատություններ կատարելու ընթացքում հայտնաբերված հաշվառումից դուրս մնացած ճանապարհատրանսպորտային պատահարների հաշվառումն իրականացվում է սույն կարգի պահանջներին համապատասխան:

13. Ճանապարհատրանսպորտային պատահարների կենտրոնացված պետական հաշվառումն իրականացնում է ճանապարհային ոստիկանության վարչական մասի համապատասխան ծառայությունը` ճանապարհատրանսպորտային պատահարների պետական կենտրոնացված հաշվառման մատյանի վարման միջոցով և պետական վիճակագրական ամփոփ հաշվետվություն է ներկայացնում Հայաստանի Հանրապետության ազգային վիճակագրական ծառայություն:

14. Ընդհանուր օգտագործման պետական ավտոմոբիլային ճանապարհների կահավորանքի, շահագործման, նորոգման և պահպանման աշխատանքների պատճառով տեղի ունեցած ճանապարհատրանսպորտային պատահարների վերաբերյալ ճանապարհային ոստիկանության վարչական մասի համապատասխան ծառայությունը տեղեկատվություն է ներկայացնում Հայաստանի Հանրապետության տրանսպորտի և կապի նախարարություն:

15. Յուրաքանչյուր ճանապարհատրանսպորտային պատահարի համար լրացվում է հաշվառման քարտ:

16. Ճանապարհատրանսպորտային պատահարների հաշվառման քարտը լրացվում է ճանապարհատրանսպորտային պատահարների տարածքային հաշվառման մատյանը վարող ծառայողի կողմից, և ոչ ուշ, քան պատահարի մասին հաղորդում ստանալու (տեղեկանալու) պահից 5 օրվա ընթացքում ուղարկվում ճանապարհային ոստիկանության վարչական մաս, որտեղ դրանք պահպանվում են 3 տարի ժամկետով:

17. Ճանապարհատրանսպորտային պատահարների հետ կապված նոր հանգամանքներ և տվյալներ ի հայտ գալու դեպքում լրացվում է լրացուցիչ քարտ, որի մեկ օրինակը սույն կարգի 16-րդ կետով սահմանված կարգով ուղարկվում է ճանապարհային ոստիկանության վարչական մաս:

17.1. Պետական վիճակագրության մեջ որպես ճանապարհատրանսպորտային պատահարների հետևանքով զոհված են հաշվառվում այն անձինք, ովքեր մահացել են պատահարը տեղի ունենալու օրվանից 30 օրվա ընթացքում:

(17.1 կետը լրաց. 04.07.12 N 884-Ն)

17.2. Այն դեպքում, երբ ճանապարհատրանսպորտային պատահարը տեղի է ունեցել հաշվետու տարվա դեկտեմբերի 15-ից հետո, իսկ մահն արձանագրվել է հաջորդ տարվա հունվարի 15-ից (ճանապարհատրանսպորտային պատահարի տարեկան տվյալների ամփոփման` սույն կարգի 18-րդ կետով սահմանված վերջնաժամկետից) հետո, անգամ 30-օրյա ժամկետի պահպանման դեպքում մահացած անձինք որպես ճանապարհատրանսպորտային պատահարների հետևանքով զոհված չեն հաշվառվում:

(17.2 կետը լրաց. 04.07.12 N 884-Ն)

18. Ճանապարհատրանսպորտային պատահարների տարեկան տվյալների ամփոփման վերջնաժամկետը հաջորդող տարվա հունվարի տասնհինգն է:

19. Ճանապարհատրանսպորտային պատահարների մասին տարեկան ամփոփ տվյալների շտեմարանը պահպանվում է ճանապարհային ոստիկանության վարչական մասում` 10 տարի ժամկետով:

20. Ճանապարհատրանսպորտային պատահարների հաշվառման տվյալները բաց են և Հայաստանի Հանրապետության օրենսդրությամբ սահմանված կարգով տրամադրվում են իրավաբանական ու ֆիզիկական անձանց:

(Հավելվածը լրաց. 04.07.12 N 884-Ն)