«Գրանցված է»

ՀՀ արդարադատության

նախարարության կողմից

12 մայիսի 2011 թ.

Պետական գրանցման թիվ 11011218

 

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

 

ԿՐԹՈՒԹՅԱՆ ԵՎ ԳԻՏՈՒԹՅԱՆ ՆԱԽԱՐԱՐ

 

5 ապրիլի 2011 թ.

N 280-Ն

 

Հ Ր Ա Մ Ա Ն

 

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԴՊՐՈՑԱԿԱՆՆԵՐԻ ԱՌԱՐԿԱՅԱԿԱՆ ՕԼԻՄՊԻԱԴԱՆԵՐԻ ԿԱԶՄԱԿԵՐՊՄԱՆ ԵՎ ԱՆՑԿԱՑՄԱՆ ԿԱՐԳԸ ՀԱՍՏԱՏԵԼՈՒ ՄԱՍԻՆ

 

Ղեկավարվելով «Հանրակրթության մասին» ՀՀ օրենքի 30-րդ հոդվածի 25 կետի պահանջով և հիմք ընդունելով Հայաստանի Հանրապետության կառավարության 2002 թվականի սեպտեմբերի 12-ի «Հայաստանի Հանրապետության կրթության և գիտության նախարարության կանոնադրությունը, նախարարության աշխատակազմի կառուցվածքը, նախարարության աշխատակազմին հանձնվող գույքի կազմը և չափը հաստատելու մասին» N 1579-Ն որոշումը և Հայաստանի Հանրապետության կրթության և գիտության նախարարի 2010 թվականի դեկտեմբերի 30-ի «Կրթական համակարգում կոռուպցիոն երևույթների դեմ պայքարի 2011-2012 թվականների միջոցառումների համալիր ծրագիրը հաստատելու մասին» N 1806 Ա/Ք հրամանը.

 

 ՀՐԱՄԱՅՈՒՄ ԵՄ՝

 

1. Հաստատել «ՀՀ դպրոցականների առարկայական օլիմպիադաների կազմակերպման և անցկացման» կարգը` համաձայն հավելվածի:

2. Հայաստանի Հանրապետության կրթության և գիտության նախարարության աշխատակազմի հանրակրթության վարչության պետ Ն. Հովհաննիսյանին և իրավաբանական վարչության պետ Մ. Գրիգորյանին` հրամանը սահմանված կարգով ներկայացնել Հայաստանի Հանրապետության արդարադատության նախարարություն` պետական գրանցման:

3. Հրամանի կատարման հսկողությունը վերապահել նախարարի տեղակալ Մ. Մկրտչյանին:

 

Ա. Աշոտյան

 

Հավելված ՀՀ կրթության և գիտության նախարարի 2011 թվականի ապրիլի 5-ի N 280-Ն հրամանի

 

Կ Ա Ր Գ

 

ՀՀ ԴՊՐՈՑԱԿԱՆՆԵՐԻ ԱՌԱՐԿԱՅԱԿԱՆ ՕԼԻՄՊԻԱԴԱՅԻ ԿԱԶՄԱԿԵՐՊՄԱՆ ԵՎ ԱՆՑԿԱՑՄԱՆ

 

1. Ընդհանուր դրույթներ

 

1) Սույն կարգով կարգավորվում են դպրոցականների առարկայական օլիմպիադաների (այսուհետ` Օլիմպիադա) կազմակերպման և անցկացման հետ կապված հարաբերությունները:

2) Դպրոցականների առարկայական հանրապետական օլիմպիադան պետական նշանակության միջոցառում է, որը կազմակերպում և վերահսկում է Հայաստանի Հանրապետության կրթության և գիտության նախարարությունը (այսուհետ՝ նախարարություն):

3) Օլիմպիադաները անցկացվում են հանրակրթական 16 առարկաներից` 3 կամ 4 փուլերով:

4) Հանրակրթական 9 առարկաներից՝ հայոց լեզու, հայ գրականություն, ռուսաց լեզու, անգլերեն, ֆրանսերեն, գերմաներեն, պատմություն, հայ առաքելական եկեղեցու պատմություն, նախնական զինվորական պատրաստություն, օլիմպիադան անց է կացվում 4 փուլով.

ա. դպրոցական փուլ

բ. տարածքային (վարչական կամ նախկին վարչական շրջան) փուլ

գ. մարզային փուլ

դ. հանրապետական փուլ:

5) Հանրակրթական 7 առարկաներից՝ աշխարհագրություն, մաթեմատիկա, ֆիզիկա, քիմիա, կենսաբանություն, ինֆորմատիկա, աստղագիտություն, օլիմպիադան անց է կացվում 3 փուլով՝ համաձայն նախարարության սահմանած ընթացակարգերի՝

ա. դպրոցական փուլ

բ. մարզային փուլ

գ. հանրապետական փուլ:

(գլուխը լրաց. 28.12.11 N 1347-Ն, խմբ. 15.01.14 N 19-Ն, 29.12.14 N 1208-Ն)

 

2. Օլիմպիադաների հիմնական սկզբունքներն են.

 

1) Օլիմպիադաների մարդասիրական բնույթը, ազգային համամարդկային արժեքների, անհատի ազատ և համակողմանի զարգացման առաջնայնությունը, աշխատասիրությունը, պատասխանատվությունը,

2) Օլիմպիադաների հավասար հնարավորությունները, մատչելիությունը, շարունակականությունը, հաջորդականությունը և համապատասխանությունը սովորողների զարգացման մակարդակին, առանձնահատկություններին ու պատրաստվածության աստիճանին,

3) Օլիմպիադայում ժողովրդավարական կառավարման սկզբունքների ապահովումը,

4) Օլիմպիադաներում ստեղծագործական աշխատանքի խթանումը, սովորողների վերլուծական, քննադատական մտածողության, գիտելիքների ինքնուրույն ձեռքբերման և կիրառման, տեղեկատվական տեխնոլոգիաների օգտագործման ունակությունների զարգացման առաջնայնությունը:

 

3. Օլիմպիադաների նպատակներն ու խնդիրներն են.

 

1) Տաղանդավոր, շնորհալի և ստեղծագործական կարողություն ունեցող երեխաների հայտնաբերումը և նրանց հետ անհատական աշխատանքի կազմակերպումը,

2) Ուսումնական առարկաների նկատմամբ սովորողների հետաքրքրությունների զարգացումը և այդ առարկաներից խոր ու կայուն գիտելիքներ ստանալուն նպաստելը,

3) Առարկայական խմբակների, նախասիրական պարապմունքների և այլ ուսումնական աշխատանքների խթանումը,

4) Ստեղծագործ ուսուցիչների, բուհերի դասախոսների, գիտահետազոտական հիմնարկների աշխատակիցների և ուսուցիչների ներգրավումը օժտված երեխաների հայտնաբերման ու ուսուցման գործում,

5) Հայաստանի Հանրապետության` միջազգային օլիմպիադաներին, մրցույթներին մասնակցող թիմերի ձևավորումը և նրանց հետ աշխատանքի կազմակերպումը:

 

4. Օլիմպիադաների կառավարումը.

 

1) Օլիմպիադաների կազմակերպման քաղաքականությունը մշակելու և իրականացնելու նպատակով` որպես օլիմպիադաների կառավարման բարձրագույն մարմին, ՀՀ ԿԳ նախարարի հրամանով ստեղծվում է մշտական գործող հանրապետական օլիմպիական խորհուրդ (այսուհետ` խորհուրդ): Խորհրդի աշխատակարգը հաստատում է ՀՀ ԿԳ նախարարը: Խորհրդին կից կարող են գործել մասնագիտական առարկայական աշխատանքային խմբեր:

2) Օլիմպիական խորհրդի կազմում ընդգրկվում են ՀՀ ԿԳ նախարարը (նախագահ), նախարարության հանրակրթության ոլորտը համակարգող նախարարի տեղակալը, հանրակրթության վարչության աշխատակիցներ, մարզպետարանների և Երևանի քաղաքապետարանի կրթության վարչության պետեր կամ տեղակալներ, օլիմպիադաներում առաջատար հանրակրթական ուսումնական հաստատությունների տնօրեններ, բուհերի և հասարակական կազմակերպությունների ներկայացուցիչներ:

3) Օլիմպիադաները նախապատրաստելու և անցկացնելու նպատակով ստեղծվում են հանրապետական, մարզային, տարածքային, դպրոցական օլիմպիական կազմկոմիտեներ և առարկայական հանձնաժողովներ: Հանրապետական կազմկոմիտեի և առարկայական հանձնաժողովների անվանական կազմը նախարարի հաստատմանն է ներկայացնում հանրակրթության վարչությունը: Մարզային (Երևանի քաղաքային) ու տարածքային կազմկոմիտեների և առարկայական հանձնաժողովների անդամների անվանական կազմը հաստատում է մարզպետը (Երևանի քաղաքապետը) կրթության վարչության ներկայացմամբ: Դպրոցական կազմկոմիտեի և առարկայական հանձնաժողովների կազմը հաստատում է տնօրենը:

 

5. Օլիմպիական խորհրդի գործառույթները.

 

1) Մշակում է օլիմպիադաների նախապատրաստական աշխատանքների իրականացման, անցկացման, բողոքարկման ընթացակարգերը, ինչպես նաև վերահսկողության իրականացման, լուսաբանման, թափանցիկության և մասսայականության ապահովման մեխանիզմները:

2) Սահմանում է կազմկոմիտեների և առարկայական հանձնաժողովների ձևավորման սկզբունքները, նրանց պարտականություններն ու իրավունքները:

3) Մշակում է օլիմպիադաների անցկացման ժամանակացույցը կազմելու սկզբունքները, օլիմպիադաներին աշակերտների մասնակցության տարիքային սանդղակը, սահմանում քվոտաների (սահմանված թվաքանակ) տրամադրման կարգը:

4) Ուսումնական տարվա համար կազմում է օլիմպիադաների տարեկան ծրագիրը, մշակում հեռանկարային ծրագրեր:

5) Աջակցում է մասնագիտական առարկայական աշխատանքային խմբերին մեթոդական գրականության ստեղծման և հրատարակման, ինչպես նաև խնդիրների, առաջադրանքների կազմման և գնահատման մեթոդաբանության մշակման գործում:

6) Աշխատանքային խմբերի օգնությամբ հրապարակում է նախորդ տարիների օլիմպիադաների խնդիրները և լուծումները, մարզային և հանրապետական փուլերի հաղթողների ցուցակները:

7) Սահմանված կարգով ներկայացնում է առաջարկություններ ՀՀ դպրոցականների առարկայական օլիմպիադաների անցկացման կարգում փոփոխություններ կատարելու վերաբերյալ:

8) Առաջարկություններ է ներկայացնում հայ անվանի գիտնականների հոբելյանական օրերին նվիրված կամ ՀՀ-ում միջազգային և այլ օլիմպիադաների կազմակերպման վերաբերյալ:

9) Մշակում և իրականացնում է անհատների ու տարբեր կազմակերպությունների կողմից օլիմպիադաներին աջակցության ծրագրեր:

10) Ուսումնական տարվա վերջում քննարկում ու վերլուծում է օլիմպիադաների արդյունքները, տալիս է համապատասխան գնահատական և առաջարկություններ, խրախուսման է ներկայացնում կազմկոմիտեների և առարկայական հանձնաժողովների անդամներին:

11) Մշակում և իրականացնում է միջազգային օլիմպիադաներում մեր աշակերտների ձեռքբերումների լուսաբանմանն ու օլիմպիադաների թափանցիկության նկատմամբ հանրության վստահության բարձրացմանն ուղղված միջոցառումներ:

12) Քննարկում է առարկայական օլիմպիադաների հանրապետական հանձնաժողովների նախագահների անվանական կազմը և ներկայացնում ՀՀ կրթության և գիտության նախարարի հաստատմանը:

13) Մշակում է օլիմպիական թիմերի հավակնորդների ընտրության, ուսումնական տարվա ընթացքում նրանց հետ իրականացվող նախապատրաստական դասընթացների և հավաքների կազմակերպման ու ֆինանսավորման կարգը:

 

6. Հանրապետական կազմկոմիտեի գործառույթները.

 

1) Սահմանում է մարզային փուլի անցկացման ժամկետները` ըստ առարկաների,

2) Սահմանում է հանրապետական փուլի անցկացման վայրերը և ժամկետները` ըստ առարկաների,

3) Նախապատրաստում է հանրապետական փուլի կազմակերպումը` համաձայն սահմանված ընթացակարգի,

4) Սահմանում է հանրապետական փուլի մասնակիցների թիվը` ըստ առարկաների և մարզերի,

5) Վերահսկում է հանրապետական փուլի անցկացումը և խրախուսման ներկայացնում հաղթողներին,

6) Վերահսկում է մարզային փուլի անցկացումը,

7) Նախարարի հաստատմանն է ներկայացնում հանրապետական առարկայական հանձնաժողովների և միջազգային օլիմպիադաներին մասնակցող թիմերի կազմերը:

 

7. Հանրապետական առարկայական հանձնաժողովների գործառույթները.

 

1) Համաձայն սահմանված ընթացակարգի` անցկացնում են հանրապետական փուլը և պատասխանատվություն են կրում անցկացման ողջ գործընթացի համար,

2) Կազմում են հանրապետական և մարզային փուլերի մրցութային առաջադրանքները,

3) Որոշում են հանրապետական փուլի հաղթողներին և նրանց պարգևատրում համապատասխան դիպլոմներով ու գովասանագրերով,

4) Համաձայն սահմանված ընթացակարգի` որոշում են միջազգային օլիմպիադաներին մասնակցող թիմերի թեկնածուների կազմը և նրանց հետ կազմակերպում լրացուցիչ աշխատանք,

5) Համաձայն սահմանված ընթացակարգի` հանրապետական կազմկոմիտեին առաջարկություն են ներկայացնում միջազգային օլիմպիադաներին մասնակցող թիմերի կազմերի մասին:

 

8. Մարզային կազմկոմիտեի գործառույթները.

 

1) Որոշում է մարզային փուլի անցկացման վայրերը` ըստ առարկաների,

2) Նախապատրաստում է մարզային փուլի կազմակերպումը` համաձայն սահմանված ընթացակարգի,

3) Վերահսկում է օլիմպիադաների անցկացումը և խրախուսման ներկայացնում հաղթողներին,

4) Առարկայական հանձնաժողովների երաշխավորության հիման վրա մարզային փուլի հաղթողներին ներկայացնում է մասնակցելու հանրապետական փուլին` ըստ քվոտաների:

 

9. Մարզային առարկայական հանձնաժողովների գործառույթները.

 

1) Համաձայն սահմանված ընթացակարգի` անցկացնում են մարզային փուլը և պատասխանատվություն են կրում ողջ գործընթացի համար,

2) Որոշում են մարզային փուլի հաղթողներին և նրանց պարգևատրում համապատասխան դիպլոմներով ու գովասանագրերով,

3) Մարզային կազմկոմիտեին առաջարկություն են ներկայացնում հանրապետական փուլին մասնակցող թիմերի մասին,

4) Կազմում են տարածքային և դպրոցական փուլերի մրցութային առաջադրանքները:

 

10. Տարածքային կազմկոմիտեի գործառույթները.

 

1) Սահմանում է տարածքային փուլի անցկացման ժամկետներն ու վայրերը` ըստ առարկաների,

2) Նախապատրաստում է տարածքային փուլի կազմակերպումը` համաձայն սահմանված ընթացակարգի,

3) Առարկայական հանձնաժողովների երաշխավորության հիման վրա տարածքային փուլի հաղթողներին ներկայացնում է մասնակցելու մարզային փուլին,

4) Վերահսկում է օլիմպիադաների անցկացումը և խրախուսման ներկայացնում հաղթողներին:

 

11. Տարածքային առարկայական հանձնաժողովների գործառույթները.

 

1) Անցկացնում են տարածքային փուլը և պատասխանատվություն են կրում ողջ գործընթացի համար` համաձայն սահմանված ընթացակարգի,

2) Որոշում են տարածքային փուլի հաղթողներին և նրանց պարգևատրում համապատասխան դիպլոմներով ու գովասանագրերով,

3) Տարածքային կազմկոմիտեին առաջարկություն են ներկայացնում մարզային փուլին մասնակցող թիմերի կազմերի մասին:

 

12. Դպրոցական կազմկոմիտեի գործառույթները.

 

1) Սահմանում է դպրոցական փուլի անցկացման ժամկետները` ըստ առարկաների,

2) Նախապատրաստում է դպրոցական փուլի կազմակերպումը` համաձայն սահմանված ընթացակարգի,

3) Առարկայական հանձնաժողովների երաշխավորության հիման վրա դպրոցական փուլի հաղթողներին ներկայացնում է մասնակցելու տարածքային փուլին,

4) Վերահսկում է օլիմպիադաների անցկացումը և խրախուսման ներկայացնում հաղթողներին:

 

13. Դպրոցական առարկայական հանձնաժողովների գործառույթները.

 

1) Անցկացնում են դպրոցական փուլը և պատասխանատվություն են կրում ողջ գործընթացի համար` համաձայն սահմանված ընթացակարգի,

2) Որոշում են դպրոցական փուլի հաղթողներին և նրանց պարգևատրում համապատասխան դիպլոմներով ու գովասանագրերով,

3) Դպրոցական կազմկոմիտեին առաջարկություն են ներկայացնում տարածքային փուլին մասնակցող թիմերի կազմի մասին:

 

14. Հանրապետական առարկայական օլիմպիադաների չորս փուլերի կազմակերպումը.

 

1) Առաջին` դպրոցական փուլը կազմակերպվում է դպրոցներում դեկտեմբեր-հունվար ամիսներին: Առաջին փուլին կարող է մասնակցել 5-12-րդ դասարանների ցանկացած աշակերտ: Առաջին փուլի կազմակերպման բոլոր ծախսերը հոգում են դպրոցները: Հաղթողները խրախուսվում և պարգևատրվում են դպրոցի տնօրինության կողմից:

2) Երկրորդ`տարածքային փուլը կազմակերպվում է նախկին վարչատարածքներում:

Երկրորդ փուլին մասնակցում են տվյալ տարածքում գտնվող հանրակրթական բոլոր դպրոցների (անկախ իրավական կազմակերպման ձևից) կողմից ներկայացված 7-12-րդ դասարանների աշակերտները:

Երկրորդ փուլի կազմակերպման բոլոր ծախսերը հոգում են օլիմպիադան անցկացնող վարչական տարածքները (համայնքները):

Հաղթողները խրախուսվում և պարգևատրվում են վարչական տարածքի (համայնքի) ղեկավարության կողմից:

3) Երրորդ` մարզային (Երևանի քաղաքային) փուլը կազմակերպվում է մարզկենտրոններում (Երևան քաղաքում): Երրորդ փուլին մասնակցում են տվյալ մարզի տարածքային կազմկոմիտեների կողմից երաշխավորված աշակերտները.

հայոց եկեղեցու պատմությունից` 8-12-րդ դասարանների աշակերտները, մյուս առարկաներից` 9-12-րդ դասարանների աշակերտները:

Երրորդ փուլի կազմակերպման բոլոր ծախսերը հոգում են մարզպետարանները (Երևանի քաղաքապետարանը): Հաղթողները խրախուսվում և պարգևատրվում են մարզպետարանի (Երևանի քաղաքապետարանի) կողմից:

4) Չորրորդ` հանրապետական փուլին մասնակցում են մարզային կազմկոմիտեների կողմից երաշխավորված աշակերտները.

հայոց եկեղեցու պատմությունից` 8-12-րդ դասարանների աշակերտները, մյուս առարկաներից` 9-12-րդ դասարանների աշակերտները: Օլիմպիադայի չորրորդ փուլի կազմակերպման բոլոր ծախսերը հոգում է ՀՀ կրթության և գիտության նախարարությունը:

Հաղթողները խրախուսվում և պարգևատրվում են նախարարության կողմից:

(գլուխը փոփ. 28.12.11 N 1347-Ն)

 

15. Միջազգային առարկայական օլիմպիադաներին մասնակցող թիմերի ձևավորումը.

 

1) Հանրապետական օլիմպիադաների արդյունքները ամփոփելուց հետո հանրապետական առարկայական հանձնաժողովների առաջարկությամբ կազմվում է յուրաքանչյուր առարկայի հավաքական թիմի անդամների թեկնածուների ցուցակը` համաձայն սահմանված ընթացակարգի:

2) Սահմանված ընթացակարգով թեկնածուների հետ կազմակերպվում են լրացուցիչ պարապմունքներ: Նախարարի հրամանով` ըստ առարկաների հաստատվում են պարապմունքների կազմակերպիչները:

3) Պարապմունքներից հետո հանրապետական առարկայական հանձնաժողովի կողմից անցկացվում է մրցույթ(ներ): Այդ մրցույթի(ների) արդյունքների հիման վրա ձևավորվում են միջազգային օլիմպիադաներին մասնակցող հանրապետական թիմերի կազմերը և ներկայացվում են նախարարի հաստատմանը:

4) Թեկնածուների ընտրման, լրացուցիչ մրցույթների անցկացման և թիմերի ձևավորման աշխատակարգերը սահմանում է խորհուրդը:

5) Միջազգային օլիմպիադաների մասնակից թիմերի ղեկավարներին հանրակրթության վարչության ներկայացմամբ հաստատում է նախարարը:

6) Հայաստանի թիմերի միջազգային օլիմպիադաների մասնակցության հետ կապված ֆինանսական ծախսերը հոգում է նախարարությունը:

7) Միջազգային օլիմպիադաների հաղթողներին տրվող արտոնությունները սահմանվում են օրենսդրությամբ:

(հավելվածը լրաց., փոփ. 28.12.11 N 1347-Ն, խմբ. 15.01.13 N 19-Ն, 29.12.14 N 1208-Ն)