ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

Ո Ր Ո Շ ՈՒ Մ

29 մարտի 2012 թվականի N 378-Ն

ՀԱՏՈՒԿ ՆՇԱՆԱԿՈՒԹՅԱՆ ՀՈՂԵՐՈՒՄ ՔԱՂԱՔԱՇԻՆԱԿԱՆ ԳՈՐԾՈՒՆԵՈՒԹՅԱՆ ԻՐԱԿԱՆԱՑՄԱՆ ԿԱՐԳԸ ՀԱՍՏԱՏԵԼՈՒ ՄԱՍԻՆ

Հիմք ընդունելով Հայաստանի Հանրապետության հողային օրենսգրքի 24-րդ և «Քաղաքաշինության մասին» Հայաստանի Հանրապետության օրենքի 10.1-ին, 19-րդ և 26.2-րդ հոդվածները՝ Հայաստանի Հանրապետության կառավարությունը որոշում է.

1. Հաստատել հատուկ նշանակության հողերում քաղաքաշինական գործունեության իրականացման կարգը` համաձայն հավելվածի:

2. Հայաստանի Հանրապետության կառավարության 2002 թվականի հունվարի 14-ի «Հողային պաշարների պետական կառավարման լիազոր մարմիններ սահմանելու մասին» N 26 որոշման 1-ին կետի «ժ» ենթակետով սահմանված հողային պաշարների պետական կառավարման լիազոր մարմիններին` Հայաստանի Հանրապետության կառավարությանն առընթեր ազգային անվտանգության ծառայության պետին և Հայաստանի Հանրապետության պաշտպանության նախարարին՝ սույն որոշումն ուժի մեջ մտնելուց հետո 6-ամսյա ժամկետում մշակել և սահմանված կարգով Հայաստանի Հանրապետության կառավարության քննարկմանը ներկայացնել Հայաստանի Հանրապետության հողային օրենսգրքի 24-րդ, «Պետական և ծառայողական գաղտնիքի մասին» Հայաստանի Հանրապետության օրենքի 9-րդ, 12-րդ, 14-րդ և 17-րդ հոդվածներով ամրագրված դրույթներից բխող հետևյալ իրավական ակտերի նախագծերը՝

1) «Հատուկ նշանակության հողերի նկատմամբ սահմանափակումները հաստատելու մասին» Հայաստանի Հանրապետության կառավարության որոշման նախագիծը.

2) «Հատուկ նշանակության հողերի պաշտպանական գոտիները և դրանց իրավական ռեժիմները սահմանելու մասին» Հայաստանի Հանրապետության կառավարության որոշման նախագիծը.

3) «Հատուկ նշանակության հողերում օրենքով պաշտպանվող շենքերի ու շինությունների ցանկը սահմանելու մասին» ու «Հատուկ նշանակության հողերում պետական և ծառայողական գաղտնիք պարունակող տեղեկությունների հետ կապված օբյեկտների ցանկը սահմանելու մասին» Հայաստանի Հանրապետության կառավարության որոշումների նախագծերը:

3. Սույն որոշումն ուժի մեջ է մտնում պաշտոնական հրապարակմանը հաջորդող օրվանից:

Կ Ա Ր Գ

ՀԱՏՈՒԿ ՆՇԱՆԱԿՈՒԹՅԱՆ ՀՈՂԵՐՈՒՄ ՔԱՂԱՔԱՇԻՆԱԿԱՆ ԳՈՐԾՈՒՆԵՈՒԹՅԱՆ ԻՐԱԿԱՆԱՑՄԱՆ

1. Սույն կարգով սահմանվում է հատուկ` պաշտպանական, սահմանային, ռազմական նշանակության հողերում քաղաքաշինական գործունեության կարգը։

2. Սույն կարգով սահմանված պահանջները պարտադիր են հատուկ նշանակության հողերում քաղաքաշինական գործունեության բոլոր սուբյեկտների համար:

3. Հատուկ նշանակության հողերում պետական և ծառայողական գաղտնիք պարունակող տեղեկությունների հետ կապված դեպքերում`

1) ճարտարապետահատակագծային առաջադրանքը Հայաստանի Հանրապետության օրենսդրությամբ սահմանված կարգով կառուցապատողին է տրամադրում Հայաստանի Հանրապետության կառավարության 2002 թվականի հունվարի 14-ի «Հողային պաշարների պետական կառավարման լիազոր մարմիններ սահմանելու մասին» N 26 որոշման 1-ին կետի «ժ» ենթակետով սահմանված համապատասխան ոլորտի հողային պաշարների պետական կառավարման լիազոր մարմինը (այսուհետ` լիազոր մարմին), որի հաշվեկշռում են գտնվում պաշտպանական, սահմանային, ռազմական նշանակության շենքերի, շինությունների, ինժեներական ենթակառուցվածքների օգտագործման ու սպասարկման համար տրամադրված հողամասերը.

2) «Գնումների մասին» Հայաստանի Հանրապետության օրենքով սահմանված կարգով ընտրվում է նախագծային աշխատանքներ իրականացնող կապալառուն (այսուհետ` կատարող).

3) Հայաստանի Հանրապետության կառավարության 2010 թվականի մայիսի 6-ի N 711-Ն որոշմամբ սահմանված կարգով նախագծային փաստաթղթերը կառուցապատողի կամ կատարողի կողմից (եթե այդպիսի պայման նախատեսված է նախագծային կապալի պայմանագրով) ներկայացվում են փորձաքննության.

4) փորձաքննության դրական եզրակացությամբ երաշխավորված նախագծային փաստաթղթերը համաձայնեցնում և շինարարության թույլտվություն է տրամադրում լիազոր մարմինը.

5) ավարտված շինարարության շահագործման փաստագրումը Հայաստանի Հանրապետության օրենսդրությամբ սահմանված կարգով իրականացվում է լիազոր մարմնի կողմից` Հայաստանի Հանրապետության կառավարության 2003 թվականի մայիսի 8-ի «Ավարտված շինարարության շահագործման փաստագրման կարգը հաստատելու մասին» N 626-Ն որոշմամբ հաստատված կարգի 10-րդ կետի համաձայն՝ կառուցապատողի (կամ լիազոր մարմնի, եթե նա որպես կառուցապատող հանդես չի գալիս) կողմից «Պետական և ծառայողական գաղտնիքի մասին» Հայաստանի Հանրապետության օրենքի պահանջներին համապատասխան ձևավորված` օբյեկտը շահագործման ընդունող հանձնաժողովի ակտի հիման վրա:

4. Սույն կարգի 3-րդ կետի 1-ին և 5-րդ ենթակետերով սահմանված գործառույթների իրականացումը և 4-րդ ենթակետով սահմանված նախագծային փաստաթղթերը՝ ճարտարապետաշինարարական լուծումների մասով, համաձայնեցվում են համայնքի ղեկավարի և, անհրաժեշտության դեպքում` լիազոր մարմնի նախաձեռնությամբ, քաղաքացիական պաշտպանության ոլորտի լիազորված մարմնի հետ` ապահովելով «Պետական և ծառայողական գաղտնիքի մասին» Հայաստանի Հանրապետության օրենքի պահանջները:

5. Հատուկ նշանակության հողերում պետական և ծառայողական գաղտնիք պարունակող տեղեկություններին չառնչվող դեպքերում քաղաքաշինական գործունեությունն իրականացվում է Հայաստանի Հանրապետության օրենսդրության պահանջներին համապատասխան, սույն կարգի 3-րդ կետի 1-ին, 4-րդ և 5-րդ ենթակետերում նշված գործառույթների իրականացումը համաձայնեցնելով լիազոր մարմնի հետ (եթե լիազոր մարմինը որպես կառուցապատող հանդես չի գալիս):

6. Հաստատված նախագծային փաստաթղթերում փոփոխություններ կատարվում են սույն կարգով նախատեսված ընթացակարգերին համապատասխան: