040.1246.24.12.01

«Վավերացնում եմ»
Հայաստանի Հանրապետության
Նախագահ Ռ. Քոչարյան
24 դեկտեմբերի 2001 թ.

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

Ո Ր Ո Շ ՈՒ Մ

24 դեկտեմբերի 2001 թվականի N 1246
քաղ. Երևան

ԱՊՐԱՆՔԻ ԾԱԳՄԱՆ ԵՐԿՐԻ ՀԱՎԱՍՏԱԳՐԵՐԻ ՏՐԱՄԱԴՐՄԱՆ ԵՎ ՓՈՐՁԱՔՆՆՈՒԹՅԱՆ ԱՆՑԿԱՑՄԱՆ ԿԱՐԳԸ ՀԱՍՏԱՏԵԼՈՒ ՄԱՍԻՆ

Հայաստանի Հանրապետության մաքսային օրենսգրքի 158-րդ հոդվածի 4-րդ կետին և «Առևտրաարդյունաբերական պալատների մասին» Հայաստանի Հանրապետության օրենքի 6-րդ հոդվածի «է» ենթակետին համապատասխան՝ Հայաստանի Հանրապետության կառավարությունը որոշում է.

1. Հաստատել ապրանքի ծագման երկրի հավաստագրերի տրամադրման և փորձաքննության անցկացման կարգը (կցվում է)։

1.1. Հայաստանի Հանրապետության իրավաբանական և ֆիզիկական անձանց կողմից մաքսային սահմանով տեղափոխվող մինչև 2,5 տոննա գյուղատնտեսական մթերքի համար Հայաստանի Հանրապետության առևտրաարդյունաբերական պալատի կողմից ծագման երկրի հավաստագրի տրամադրման վճարի չափը սահմանել 2000 դրամ:

(1.1-ին կետը լրաց. 30.07.09 N 869-Ն)

2. (կետն ուժը կորցրել է 30.07.09 N 869-Ն)

3. Սույն որոշումն ուժի մեջ է մտնում 2001 թվականի դեկտեմբերի 24-ից:

Կ Ա Ր Գ

ապրանքի ծագման երկրի հավաստագրերի տրամադրման ԵՎ փորձաքննության անցկացման

1. Սույն կարգով կարգավորվում է ապրանքի (տեղական և օտարերկրյա) ծագման երկրի հավաստագրերի տրամադրման և այդ նպատակով փորձաքննության անցկացման կարգը։

2. Ապրանքի ծագման երկրի հավաստագիր ստանալու համար Հայաստանի Հանրապետության իրավաբանական և ֆիզիկական անձինք Հայաստանի Հանրապետության առևտրաարդյունաբերական պալատ են ներկայացնում դիմում, որը պետք է վավերացված լինի դիմողի կամ նրա ներկայացուցչի կողմից և պարունակի հետևյալ տեղեկատվությունը՝

ա) դիմողի անվանումը (ֆիզիկական անձանց և անհատ ձեռնարկատերերի համար՝ անունը, ազգանունը),

բ) դիմողի գտնվելու (բնակության) վայրը և հեռախոսահամարը,

գ) ապրանքի անվանումը, մանրամասն նկարագրությունը, քանակը, գտնվելու վայրը, առաքվող երկիրը,

դ) տրանսպորտային միջոցը և երթուղին (որքանով այն հայտնի է)։

2.1. Հայաստանի Հանրապետության տարածքում իրավաբանական և ֆիզիկական անձանց համար մինչև 2,5 տոննա գյուղատնտեսական մթերքի ծագման երկրի հավաստագրի տրամադրման անհրաժեշտ փաստաթղթերն են`

1) դիմումը.

2) ֆիզիկական անձի համար` անձնագրի պատճենը, իրավաբանական անձի համար` պետական գրանցման վկայականի պատճենը.

3) տեղեկանք գյուղատնտեսական մթերքի արտադրության կամ գնման մասին.

4) տեղեկատվություն ներմուծողի մասին` երկիրը և անձի անվանումը:

(2.1-ին կետը լրաց. 30.07.09 N 869-Ն)

3. Ապրանք տեղափոխող անձը դիմումին կից պետք է ներկայացնի ապրանքի նկատմամբ նրա լիազորությունները հաստատող փաստաթղթի, ապրանքների առաքման ձևակերպման փաստաթղթի (բեռնագրի, հաշիվ-ապրանքագրի կամ նմանատիպ այլ փաստաթղթի) և, առկայության դեպքում, ապրանքների առաքման պայմանագրի, տեխնիկական անձնագրի կրկնօրինակները։

(3-րդ կետը փոփ. 30.07.09 N 869-Ն)

4. Փորձագետը դիմողի ներկայացրած փաստաթղթերն ուսումնասիրելուց հետո ստուգում է ապրանքի փաստացի քանակը, ճշտում է քաշը և եզրակացություն տալիս ապրանքի ծագման երկրի վերաբերյալ՝ ղեկավարվելով Հայաստանի Հանրապետության մաքսային օրենսգրքի 158-169-րդ հոդվածների պահանջներով։

5. Փորձաքննության հիման վրա փորձագետի կողմից կազմվում է ակտ (ձևը կցվում է)՝ 3 օրինակից, որտեղ նշվում է ապրանքի անվանումը, քանակը, արտադրողը, քաշը, ծագման երկիրը, ապրանքի առաքման ձևակերպման փաստաթղթի անվանումը (բեռնագիր, հաշիվ-ապրանքագիր կամ այլ փաստաթուղթ)։

6. Փորձաքննության ակտն ստորագրվում է փորձագետի և դիմողի կամ նրա ներկայացուցչի կողմից։

7. Ապրանքի ծագման երկրի հավաստագրի ձևակերպումը կատարվում է փորձաքննության ակտի հիման վրա, իսկ Հայաստանի Հանրապետությունում արտադրվող մինչև 2,5 տոննա գյուղատնտեսական մթերքի ծագման երկրի հավաստագիրը տրամադրվում է առանց փորձաքննության ակտի։

(7-րդ կետը լրաց. 30.07.09 N 869-Ն)

8. Ապրանքի ծագման երկրի հավաստագիրը ձևակերպվում և հաստատվում է 5 օրինակից, որից՝ 4 օրինակը տրվում է դիմողին, իսկ 1 օրինակը պահվում է Հայաստանի Հանրապետության առևտրաարդյունաբերական պալատում՝ 3 տարի ժամկետով։

9. Ապրանքի ծագման երկրի հավաստագրերը ձևակերպվում են «A-4» (210 x 297 մմ) չափի հատուկ պաշտպանված բլանկի վրա, տպագրական եղանակով. ԱՊՀ անդամ պետություններ արտահանվող ապրանքների համար՝ ռուսերենով՝ «CT-1» ձևին համապատասխան, այլ երկրներ արտահանվող ապրանքների համար՝ անգլերենով՝ «A» ձևին համապատասխան (ձևերը կցվում են)։

10. «CT-1» ձևի ապրանքի ծագման երկրի հավաստագրի գործողության ժամկետը սահմանվում է 12 ամիս՝ այն տալու օրվանից։

11. Ապրանքի ծագման երկրի հավաստագիրը կորցնելու կամ այն վնասվելու դեպքում Հայաստանի Հանրապետության առևտրաարդյունաբերական պալատը դիմողի ներկայացրած դիմումի հիման վրա տրամադրում է դրա՝ սահմանված կարգով հաստատված կրկնօրինակը, որը գործողության մեջ է մտնում բնօրինակը տալու օրվանից։

12. Ապրանքի ծագման երկրի հավաստագիրը տրամադրվում է դիմումի ներկայացման օրվանից 5-օրյա ժամկետում, իսկ Հայաստանի Հանրապետությունում արտադրվող գյուղատնտեսական մթերքի ծագման երկրի հավաստագիրը տրամադրվում է 1-օրյա ժամկետում:

(12-րդ կետը լրաց. 30.07.09 N 869-Ն)

13. Ապրանքի ծագման երկրի հավաստագրի տրամադրումը Հայաստանի Հանրապետության առևտրաարդյունաբերական պալատի կողմից կարող է մերժվել, եթե դիմողը՝

ա) չի ներկայացրել ապրանքի նկատմամբ իր լիազորությունները հաստատող փաստաթղթերը.

բ) չի ներկայացրել ապրանքի առաքման ձևակերպման փաստաթուղթը.

գ) չի կատարել ապրանքի ծագման երկրի որոշման նպատակով փորձաքննության անցկացման և հավաստագրերի տրամադրման համար Հայաստանի Հանրապետության օրենսդրությամբ նախատեսված վճարումները։

14. Ապրանքի ծագման երկրի հավաստագիր տալու մերժման մասին դիմումի ներկայացման օրվանից եռօրյա ժամկետում հայտնվում է դիմողին՝ նշելով մերժման պատճառը։

15. Դիմողը ապրանքի ծագման երկրի հավաստագիր տալու մերժումը կարող է բողոքարկել Հայաստանի Հանրապետության օրենսդրությամբ սահմանված կարգով։

16. Հայաստանի Հանրապետության առևտրաարդյունաբերական պալատը ապրանքի ծագման երկրի հավաստագրերի տրամադրման դիմումների և հավաստագրերի հաշվառման համար վարում է հաշվառման մատյան։