«Գրանցված է»

ՀՀ արդարադատության

նախարարության կողմից

1 նոյեմբերի 2012 թ.

Պետական գրանցման թիվ 10012394

ԱՐՅԱՆ ԴՈՆՈՐԻՆ ՏՐՎՈՂ ՏԵՂԵԿԱՏՎԱԿԱՆ ԹԵՐԹԻԿԻ, ՀԱՄԱՁԱՅՆՈՒԹՅԱՆ ԵՎ ԴՈՆՈՐԻ ԱՌՈՂՋՈՒԹՅԱՆ ՎԵՐԱԲԵՐՅԱԼ ՀԱՅՏԱՐԱՐԱԳՐԻ ՁԵՎԵՐԸ ՀԱՍՏԱՏԵԼՈՒ ՄԱՍԻՆ

Հիմք ընդունելով «Մարդու արյան և դրա բաղադրամասերի դոնորության և փոխներարկումային բժշկական օգնության մասին» Հայաստանի Հանրապետության օրենքի 17-րդ հոդվածի 3-րդ մասը`

Հրամայում եմ`

1. Հաստատել՝

1) արյան դոնորին տրվող տեղեկատվական թերթիկի ձևը` համաձայն հավելված 1-ի,

2) դոնորի համաձայնության և դոնորի առողջության վերաբերյալ հայտարարագրի ձևը` համաձայն հավելված 2-ի:

2. Հայաստանի Հանրապետության առողջապահության նախարարության աշխատակազմի իրավաբանական վարչության պետ Ի. Աբգարյանին` սույն հրամանը սահմանված կարգով ներկայացնել Հայաստանի Հանրապետության արդարադատության նախարարություն` պետական իրավական փորձաքննության և պետական գրանցման:

Դ. Դումանյան

Ձև

ԱՐՅԱՆ ԴՈՆՈՐԻՆ ՏՐՎՈՂ ՏԵՂԵԿԱՏՎԱԿԱՆ ԹԵՐԹԻԿ

1. Արյունը մարդկային կյանքեր է փրկում:

2. Արյան դոնորությունը մարդասիրական կամավոր ակտ է:

3. Արյանը փոխարինող որևէ միջոց չկա, այդ իսկ պատճառով Ձեր հանձնած արյունը անգին է:

4. Ձեր և Ձեր արյունը ստացող հիվանդի առողջությանը վնաս չպատճառելու նպատակով Դուք անվճար ենթարկվում եք բժշկական զննման և հակացուցումների բացակայության դեպքում Ձեզ ուղեգրում են արյունատվության:

5. Արյունատվության ընթացքում մանրէազերծ (ստերիլ) պարագաներով հավաքվում է արյուն կամ արյան բաղադրամաս, ինչը օրգանիզմում որևէ բացասական կենսաբանական փոփոխություններ չի առաջացնում:

6. Ձեր արյունը հետազոտվում է արյան միջոցով փոխանցվող մի շարք վարակների հարուցիչների նկատմամբ՝ վիրուսային հեպատիտներ Բ-ի և Ց-ի, մարդու իմունային անբավարարության վարակի, սիֆիլիսի, բրուցելոզի, ինչպես նաև որոշվում է Ձեր արյան խմբային և ռեզուս պատկանելությունը:

7. Հետազոտման արդյունքների գաղտնիությունը երաշխավորվում է, բացառությամբ Հայաստանի Հանրապետության օրենքով սահմանված դեպքերից:

8. Դուք իրավունք ունեք արյունատվությունից հրաժարվելու, ինչպես նաև արյունատվությունից հետո արյան կամ արյան բաղադրամասերի օգտագործումը ոչ պիտանի հայտարարելու` առանց պատճառների պարզաբանման:

Ձև

Հ Ա Յ Տ Ա Ր Ա Ր Ա Գ Ի Ր

ԴՈՆՈՐԻ ՀԱՄԱՁԱՅՆՈՒԹՅԱՆ ԵՎ ԴՈՆՈՐԻ ԱՌՈՂՋՈՒԹՅԱՆ ՎԵՐԱԲԵՐՅԱԼ

1. Ես` ____________________________________________________________________________

տալիս եմ իմ գրավոր համաձայնությունը արյուն կամ արյան բաղադրամաս հանձնելու վերաբերյալ և լրացնում իմ առողջական վիճակի վերաբերյալ Հայաստանի Հանրապետության առողջապահության նախարարի 2012 թվականի հունվարի 24-ի թիվ 02-Ն հրամանի հավելված 1-ով հաստատված «Դոնորի հարցաթերթիկ»-ը:

2. Ես հաստատում եմ, որ կարդացել և հասկացել եմ դոնորի համաձայնության և դոնորի առողջության վերաբերյալ հայտարարագիրը, ինչպես նաև լրացրել եմ դոնորի հարցաթերթիկը: Ունեցել եմ հնարավորություն ավագ բուժաշխատողին տալ ինձ անհանգստացնող հարցերը։

3. Տեղեկացված եմ, որ`

1) իմ առողջական վիճակի վերաբերյալ կեղծ կամ ոչ լիարժեք տեղեկատվություն տրամադրելու դեպքում արյունատվության ժամանակ կարող եմ վնաս հասցնել իմ առողջությանը.

2) ՀՀ քրեական օրենսգրքով սահմանված կարգով կենթարկվեմ քրեական պատասխանատվության տեղեկատվությունը թաքցնելու, ոչ ճիշտ տրամադրելու, խեղաթյուրելու արդյունքում մեկ այլ անձին ՄԻԱՎ վարակով կամ սեռավարակով կամ շրջապատի համար վտանգ ներկայացնող այլ հիվանդությամբ (բրուցելոզ, տուբերկուլոզ, վիրուսային հեպատիտներ և այլն) վարակելու համար (ՀՀ քրեական օրենսգրքի 177-րդ հոդված` Մարդու իմունային անբավարարության վիրուսով վարակելը, 178-րդ հոդված` Մարդու իմունային անբավարարության վիրուսով անզգուշությամբ վարակելը, 179-րդ հոդված` Սեռավարակով վարակելը, 180-րդ հոդված` Սեռավարակով անզգուշությամբ վարակելը, 181-րդ հոդված` Շրջապատի համար վտանգ ներկայացնող հիվանդությամբ վարակելը).

3) իմ արյան փորձանմուշի պարտադիր հետազոտությունների արդյունքները (դրական կամ կասկածելի) սահմանված կարգով պետք է հաղորդվեն համապատասխան բժշկական կենտրոններ.

4) իրավունք ունեմ արյունատվությունից հրաժարվելու, ինչպես նաև արյունատվությունից հետո արյան կամ արյան բաղադրամասերի օգտագործումը ոչ պիտանի հայտարարելու` առանց պատճառների պարզաբանման:

4. Տալիս եմ իմ համաձայնությունը արյան դոնորություն իրականացնող բժշկական կազմակերպության ավագ բուժաշխատողին արյան ռեեստրում առկա տեղեկատվության (իմ առողջական վիճակի, արյունատվության հակացուցման, արյունատվության ամսաթվի, ստացված արյան բաղադրամասերի անվանման, միավորների քանակի) հասանելիության վերաբերյալ: