Գանգատ թիվ 42770/20

Լիանա ԿԱՐԱՊԵՏՅԱՆՆ ընդդեմ Հայաստանի

Մարդու իրավունքների եվրոպական դատարանը (Հինգերորդ բաժանմունք), 2026 թվականի փետրվարի 5-ին հանդես գալով Կոմիտեի հետևյալ կազմով՝

Անդրեաս Զունդ [Andreas Zünd]՝ Նախագահ,

Դիանա Սարկու [Diana Sârcu],

Միկոլա Գնատովսկի [Mykola Gnatovskyy]՝ դատավորներ,

և Վիկտորիա Մարադուդինա [Viktoriya Maradudina]՝ Բաժանմունքի քարտուղարի տեղակալի պաշտոնակատար,

հաշվի առնելով «Մարդու իրավունքների և հիմնարար ազատությունների պաշտպանության մասին» կոնվենցիայի (Կոնվենցիա) 34-րդ հոդվածի համաձայն՝ ընդդեմ Հայաստանի Հանրապետության՝ 2020 թվականի սեպտեմբերի 9-ին Դատարան ներկայացրած վերոնշյալ գանգատը,

հաշվի առնելով պատասխանող Կառավարության ներկայացրած դիտարկումները,

անցկացնելով խորհրդակցություն, կայացրեց հետևյալ որոշումը.

ՓԱՍՏԵՐԸ ԵՎ ԸՆԹԱՑԱԿԱՐԳԸ

Դիմումատուի տվյալները ներկայացված են կից աղյուսակում:

Դիմումատուին ներկայացրել է Երևանում գործող իրավաբան տկն Լ. Սահակյանը:

Դիմումատուի՝ կալանավորման համար հիմնավոր և բավարար պատճառների բացակայության մասով՝ Կոնվենցիայի 5-րդ հոդվածի 3-րդ կետի համաձայն ներկայացված բողոքն ուղարկվել է Հայաստանի կառավարություն (Կառավարություն):

ԻՐԱՎՈՒՆՔԸ

Կոնվենցիայի 5-րդ հոդվածի 3-րդ կետի համաձայն ներկայացված բողոք (կալանավորման համար հիմնավոր և բավարար պատճառների բացակայություն)

Սույն գանգատում քննելով իրեն ներկայացված բոլոր նյութերը՝ Դատարանը համարում է, որ դիմումատուի բողոքը կալանավորման համար հիմնավոր և բավարար պատճառների ենթադրյալ բացակայության առնչությամբ անընդունելի է։

Մասնավորապես Դատարանը նշում է, որ դիմումատուն գրավի դիմաց ազատ է արձակվել 2020 թվականի փետրվարի 28-ին։ Հետևաբար վեցամսյա ժամկետն սկսվել է նշված ամսաթվից և ավարտվել 2020 թվականի օգոստոսի 28-ին։ Համաձայն Մասեն ընդդեմ Ֆրանսիայի (որոշում) [Masse v. France (dec.)] (թիվ 47506/20, §§ 29–31, 2025 թվականի մարտի 25) գործով Դատարանի վերջին եզրահանգումների՝ եռամսյա ժամկետի՝ COVID-ով պայմանավորված բացառիկ երկարաձգումը չի տարածվում սույն գործի վրա։ Հետևաբար 2020 թվականի սեպտեմբերի 9-ին ներկայացված սույն գանգատը ներկայացվել է ժամկետի խախտմամբ։

Հաշվի առնելով վերոնշյալը՝ Դատարանը գտնում է, որ սույն գանգատը ներկայացվել է ժամկետի խախտմամբ և պետք է մերժվի՝ Կոնվենցիայի 35-րդ հոդվածի 1-ին և 4-րդ կետերի համաձայն:

Այս հիմնավորմամբ Դատարանը միաձայն՝

Հայտարարում է գանգատն անընդունելի:

Կատարված է անգլերենով և գրավոր ծանուցվել է 2026 թվականի փետրվարի 26-ին։

ՀԱՎԵԼՎԱԾ

Կոնվենցիայի 5-րդ հոդվածի 3-րդ կետի համաձայն ներկայացված բողոքներ պարունակող գանգատ (կալանավորման համար հիմնավոր և բավարար պատճառների բացակայությունը)