Հ Ա Մ Ա Ձ Ա Յ Ն Ա Գ Ի Ր

Հայաստանի Հանրապետության մշակույթի եվ երիտասարդության հարցերի նախարարության եվ Ռուսաստանի Դաշնության մշակույթի եվ զանգվածային հաղորդակցության նախարարության միջեվ մշակույթի բնագավառում համագործակցության մասին

Հայաստանի Հանրապետության մշակույթի և երիտասարդության հարցերի նախարարությունը և Ռուսաստանի Դաշնության մշակույթի և զանգվածային հաղորդակցության նախարարությունը, այսուհետ` Կողմեր.

հիմնվելով այն համոզմունքի վրա, որ մշակույթի, արվեստի և զանգվածային հաղորդակցության բնագավառներում համագործակցությունը նպաստում է Հայաստանի և Ռուսաստանի միջև փոխըմբռնմանը, բարիդրացիական հարաբերությունների զարգացմանն ու ամրապնդմանը,

նկատի ունենալով երկու պետությունների միջև երկարատև պատմական կապերը,

համաձայնեցին ներքոհիշյալի մասին.

Հոդված 1

Կողմերը բարենպաստ պայմաններ կստեղծեն երաժշտարվեստի, թատերարվեստի, գեղարվեստի, կինեմատոգրաֆիայի, գրադարանային և թանգարանային գործի, պատմամշակութային ժառանգության օբյեկտների պահպանման, ժողովրդական արհեստների, դեկորատիվ-կիրառական, ինքնագործ, էստրադային և կրկեսային արվեստի, ինչպես նաև հումանիտար գործունեության այլ տեսակների բնագավառներում համագործակցության զարգացման համար:

Հոդված 2

Կողմերը կնպաստեն Կողմերի պետություններում գործող ստեղծագործական միությունների և միավորումների, ոչ կառավարական կազմակերպությունների միջև ուղիղ կապերի հաստատմանը և զարգացմանը:

Հոդված 3

Կողմերը կհամագործակցեն մշակույթի և արվեստի առանձին մասնագիտությունների գծով աշխատակիցների պատրաստման և որակավորման բարձրացման բնագավառներում, անհրաժեշտության դեպքում լրացուցիչ պայմանագրերով և արձանագրություններով սահմանելով աշակերտների, ուսանողների, ասպիրանտների և մանկավարժների երկկողմ փոխանակումների սկզբունքները, ինչպես նաև կաջակցեն Կողմերի պետությունների մշակույթի և արվեստի ուսումնական հաստատությունների միջև ուղիղ համագործակցությանը:

Կողմերը կնպաստեն ուսումնական ստեղծագործական ԲՈՒՀ-երի կողմից իրականացվող մշակութային ակցիաների և միջոցառումների (կուրսեր, մրցույթներ, փառատոներ) մասին տեղեկատվության փոխանակմանը և Կողմերի ներկայացուցիչների մասնակցությանը Հայաստանի Հանրապետությունում և Ռուսաստանի Դաշնությունում կազմակերպվող կոնֆերանսներին, կոլոքվիումներին, նստաշրջաններին և գիտական գիտելիքների փոխանակման այլ ձևերին:

Հոդված 4

Կողմերը միմյանց փոխադարձաբար կտեղեկացնեն մշակույթի, զանգվածային հաղորդակցության և մտավոր սեփականության բնագավառում գործունեության գերակա ուղղությունների, գիտական հետազոտությունների արդյունքների մասին, այդ նպատակով կանցկացնեն համատեղ գիտագործնական և ստեղծագործական սեմինարներ, կոնֆերանսներ և գիտաժողովներ, կաջակցեն գիտական աշխատությունների ժողովածուների հրատարակությանն ու թարգմանությանը` կիրառելով համագործակցության ձևերի բազմազանությունը:

Կողմերը կնախատեսեն սոցիալ-մշակութային և այլ բնագավառներում փոխկապակցված համալիր միջոցառումների իրականացում, ներառյալ յուրաքանչյուր Կողմի մշակութային-տեղեկատվական դաշտի տվյալների բազայի հասանելիության ապահովումը համատեղ ծրագրերի իրականացման միջոցով:

Հոդված 5

Կողմերը կապահովեն մշակութային արժեքների հասանելիությունը մյուս Կողմի պետության քաղաքացիների համար:

Հոդված 6

Կողմերն` իրենց ազգային օրենսդրությանը և միջազգային իրավունքի նորմերին համապատասխան, իրենց իրավասությունների շրջանակներում, կհամագործակցեն մյուս Կողմի պետության տարածք ապօրինի ներմուծված մշակութային արժեքների հայտնաբերման և վերադարձնելու ուղղությամբ:

Հոդված 7

Կողմերը կապահովեն Կողմերի պետությունների տարածքներում ապրող ժողովուրդների ազգային, էթնիկ, կոնֆեսիոնալ մշակույթների ազատ և իրավահավասար զարգացումը, պայմաններ կստեղծեն Հայաստանի Հանրապետությունում ռուս ազգային փոքրամասնությանը պատկանող անձանց և Ռուսաստանի Դաշնությունում հայ ազգային փոքրամասնությանը պատկանող անձանց ազգային ինքնության պահպանման, զարգացման և արտահայտման համար:

Կողմերը, հնարավորության սահմաններում կաջակցեն նշված ազգային փոքրամասնությունների ներկայացուցիչներին Կողմերի պետությունների տարածքում զանգվածային տեղեկատվության միջոցների օգտագործմանը, ինչպես նաև մեթոդական և այլ օգնություն կցուցաբերեն յուրաքանչյուր Կողմի պետության ազգային փոքրամասնությունների մշակույթի և արվեստի գործիչների միավորումների և միությունների, մշակույթի կենտրոնների հիմնադրման ժամանակ:

Հոդված 8

Կողմերը համագործակցություն կիրականացնեն կինեմատոգրաֆիայի բնագավառում, այդ թվում՝ Հայաստանի Հանրապետության մշակույթի և երիտասարդության հարցերի նախարարության և Ռուսաստանի Դաշնության մշակույթի և զանգվածային հաղորդակցության նախարարության ենթակայության տակ գտնվող ազգային կինոարխիվների միջև:

Կողմերը բարենպաստ պայմաններ կստեղծեն.

- կինեմատոգրաֆիայի աշխատողների ստեղծագործական միությունների և համապատասխան հաստատությունների միջև համագործակցության համար,

- երկու պետություններում կազմակերպվող գործընկեր-պետությունների կինեմատոգրաֆիստների և արվեստի գործիչների, ֆիլմերի մասնակցությանը միջազգային կինոփառատոներին` համաձայն այդ փառատոների կանոնակարգի,

- կինոնախագծերի իրացմանը և կինոարտադրության փոխանակմանը` ոչ առևտրային հիմունքներով:

Հոդված 9

Կողմերը համագործակցություն կիրականացնեն իրենց պատմամշակութային ժառանգության հուշարձանների և օբյեկտների պաշտպանության, պահպանության և վերականգնման բնագավառում:

Կողմերը կփոխգործակցեն մշակույթի բնագավառում միջազգային նախագծերի իրականացման շրջանակներում:

Համագործակցության ձևերը, փորձագետների խմբերի ձևավորումը, աշխատակարգը կարող են սահմանվել Հայաստանի Հանրապետության և Ռուսաստանի Դաշնության համապատասխան հաստատությունների միջև առանձին պայմանագրերով և համաձայնագրերով:

Հոդված 10

Կողմերը համագործակցություն կիրականացնեն Հայաստանի Հանրապետության և Ռուսաստանի Դաշնության գրադարանների միջև գրափոխանակմանը, գրադարանային գործին նվիրված գրադարանավարների և մատենագիրների մասնակցությանը գիտագործնական կոնֆերանսներին, գիտաժողովներին, սեմինարներին մասնակցությանն աջակցելու ճանապարհով:

Հոդված 11

Կողմերն իրենց իրավասության շրջանակներում կաջակցեն զանգվածային տեղեկատվության տպագիր միջոցների, հրատարակչությունների, գրատարածման կազմակերպությունների և պոլիգրաֆիկ ձեռնարկությունների միջև ուղիղ համագործակցությանը, այդ թվում՝ փոխադարձ մասնակցությանը գրքի ցուցահանդեսներին և տոնավաճառներին, տպագիր արտադրանքի ցուցադրություններին և այլ համանման միջոցառումներին: Համագործակցության կոնկրետ ձևերն ու պայմանները կորոշվեն մասնակիցների կողմից:

Հոդված 12

Կողմերը կաջակցեն ժողովրդական ստեղծագործության բնագավառում կապերի ընդլայնմանը, ժողովրդական վարպետների աշխատանքների ցուցահանդեսների, ստեղծագործական սեմինարների կազմակերպմանը, Կողմերի պետությունների տարածքում անցկացվող ժողովրդական ստեղծագործության փառատոներին և երգի տոներին ազգագրական (ֆոլկլոր) համույթների մասնակցությանը:

Հոդված 13

Սույն Համաձայնագրի իրականացման նպատակով Կողմերի լիազորված ներկայացուցիչները կկնքեն առանձին պայմանագրեր:

Հոդված 14

Կողմերից յուրաքանչյուրի նախաձեռնությամբ և փոխադարձ համաձայնությամբ սույն Համաձայնագրում կարող են կատարվել փոփոխություններ և լրացումներ: Փոփոխություններն ու լրացումները կձևակերպվեն առանձին արձանագրությամբ, որն ուժի մեջ կմտնի սույն Համաձայնագրի ուժի մեջ մտնելու համար սահմանված կարգով և կհանդիսանա դրա անբաժանելի մասը:

Հոդված 15

Սույն Համաձայնագրի դրույթների մեկնաբանման կամ իրականացման հետ կապված բոլոր տարաձայնությունները Կողմերի միջև լուծվում են բանակցությունների և խորհրդատվությունների միջոցով:

Հոդված 16

Սույն Համաձայնագիրը կնքվում է անորոշ ժամկետով և ուժի մեջ է մտնում դրա ուժի մեջ մտնելու համար անհրաժեշտ ներպետական ընթացակարգերը ավարտելու մասին դիվանագիտական ուղիներով վերջին գրավոր ծանուցումը ստանալու օրվանից:

Կողմերից յուրաքանչյուրը կարող է դադարեցնել սույն Համաձայնագրի գործողությունը, այդ մասին գրավոր ծանուցելով մյուս Կողմին: Այս դեպքում Համաձայնագրի գործողությունը դադարում է այդպիսի ծանուցում ստանալու օրվանից վեց ամիս հետո:

Կատարված է Մինսկ քաղաքում, 2007 թվականի մայիսի 21-ին, երկու բնօրինակից, յուրաքանչյուրը` հայերեն և ռուսերեն, ընդ որում՝ երկու տեքստերն էլ հավասարազոր են:

Համաձայնագիրն ուժի մեջ է մտել 2007 թ. հոկտեմբերի 12-ին: